Тағы бір университет лицензиясынан айырылуы мүмкін
![Елорда ақпарат](https://elordainfo.kz/assets/img/profile-icon.png)
![Тағы бір университет лицензиясынан айырылуы мүмкін](https://elordainfo.kz/uploads/resized-images/2024/07/172107538718463480.webp)
БҒМ мәліметінше, бұрын жоғары оқу орнында профилактикалық бақылау жүргізілді. Нәтижесінде, тексеру парағының 46 тармақтан 39 тармағы бойынша заң бұзушылықтар анықталды. Университетке сәйкессіздіктерді жою үшін уақыт берілді. Алайда қайта тексеру жұмыстары жоғары оқу орны білім беру қызметінің сапасын жақсарту үшін қажетті жұмысты жүргізбегенін көрсетті.
«Шет тілдер және іскерлік карьера университетінде білім беру сапасын қамтамасыз етудің ішкі жүйесі қалыптаспаған. Білім беру бағдарламаларын, жеке оқу жоспарларын талдау белгілі бір пәндер бойынша кредиттерді игеруде үлкен айырмашылықтарды көрсетті. Тиісінше, білім алушылар пәндерді толық көлемде меңгермейді. Оқыту нәтижелері бойынша студенттердің 90%-ы шекті деңгейден өте алмады. Оқу процесінде тіпті ең төменгі белгіленген талаптарға сәйкес келмейтін ескірген компьютерлер қолданылады. Бейіндік магистратура түлегіне ғылыми-педагогикалық бағыттағы магистр дәрежесін беру бойынша заң бұзушылықтар да анықталды. Мемлекеттік аттестаттау комиссиясының шешімімен бір жылдық магистратура түлегіне екі жылдық магистр дәрежесі берілді. Бұлар жоғары оқу орнында анықталған заң бұзушылықтардың аз ғана бөлігі», – деді ҚР БҒМ білім және ғылым саласындағы сапаны қамтамасыз ету комитетінің басқарма басшысы Эльвира Сапарбекова.
Анықталған заң бұзушылықтарға байланысты комитет Шет тілдер және іскерлік карьера университеті лицензиясының қолданылуын тоқтатты. Бұдан әрі бас лицензиядан айыру және жоғары оқу орнын жабу бойынша жұмыс жүргізіледі. Заңнамаға сәйкес, лицензияның қолданылуы тоқтатыла тұрған жағдайда студенттер университеттің анықталған заң бұзушылықтарды жоюын күтпей-ақ, басқа жоғары оқу орындарына ауыса алады.