Іздеу Әкім Ысқақ: Нұр-Сұлтан – менің ең сүйікті қалам
Елорда ақпарат
Сонымен қатар ол елордадағы сүйікті орындары туралы айтты. "Астананың ең керемет жері – өзіміз қызметімізді бастаған бұрынғы Парламент үйі. Кейіннен Президент Әкімшілігі болған жер де көзге ыстық көрінеді. Содан соң шағын ғана саябақ бар болатын, сол жерге жиі барып тұратынмын. Одан кейін Әуезов көшесіндегі қалалық пошта. Әр кез қазақ газеттеріне барып жазылатынмын, таппай қалған газетті осы жерден алатынмын. Ол жердегілердің бәрі мені танитын. Сонымен қатар «Астана ақшамы» газетінің бұрынғы орналасқан жері ыстық көрінеді. Бас редактор Жұмагүл Саухат болатын. Ол жерде жұмыс істеген, туған бауырымдай болып кеткен Бекен Қайрат сияқты азаматтарды іздеп баратынмын. Тіпті онда редактордың бірінші орынбасары тағайындалып жатса да, құтты болсын айтып баратынбыз. Мәселен, журналистиканың қара нары атанған Дидахмет Әшімханов, Жанболат Аупбаевтар. Сол сияқты Қуанышбаев атындағы Қазақ драма театры ең жақсы көретін, жиі баратын жеріміз болды. Сол кездегі театрдың режиссері Қадыр Жетпісбаев деген аңқылдаған, өте көпшіл азамат еді, депутаттарды арнайы спектакльге шақырып тұратын. Қазақтың салтымен алғаш рет ерулікке шақырған да сол кісі еді", - деді қоғам қайраткері. Сондай-ақ ақын бұрынғы кездегі қаланың үскірік аязы туралы да еске алды. "Ол кезде қонақ үйден арасы өте жақын болса да, жұмысқа бару үшін көлік шақыртатынбыз. Өйткені үскірік аяз болып, жел қатты соғатын. Кейіннен биік-биік ғимараттар салынып, қаланың шеттерінде орман пайда болып, қала ішіндегі ауа райы мүлде басқаша өзгерді. Қазіргі Нұр-Сұлтан – менің ең сүйікті қалам!" - деді ол. Әкім Ысқақ жергілікті биліктің жұмысы туралы пікірін де ашық білдіріп өтті. "Қазіргі кезде жергілікті биліктің атқарып отырған жұмысы өте ауқымды. Аудан қосылып, шаҺар көлемі де арта түскен. Сол жағалау салынып, өркендеп кетті. Қалада көрікті орындар өте көп. Қазақша сөйлейтін аудитория көбейді. Толық болмаса да, елорданы біршама қазақыланды деуге болады. Бұрын қазақша сөйлейтіндер тіпті некен-саяқ болатын. Әрбір іс-шараға зиялы қауым өкілдері қатысады. Мен де бірқатар шараларға қатысып тұрамын. Қаланың қазіргі әкімі Алтай Көлгіновтің кез келген форматта журналистермен ашық сұхбатқа шығып, өзінің ойын еркін жеткізетіні ұнайды. Оның бойында жасқа тән жаңа леп, серпін бар. Жалпы, қала билігінің халық үшін жасалып жатқан қарқынды жұмыстары тұрғындар үмітін арттыруда", - деді жазушы.
