Отандық өңдеуші өнеркәсіпте инвестиция көлемі екі есеге жуық өскен

2021 жылғы қаңтар мен шілде аралығында өнеркәсіп секторындағы негізгі капиталға  3,33 трлн теңге инвестиция тартылды, бұл былтырға қарағанда 8,3%-ға аз. Күрделі салым көлемінің төмендеу деңгейі 10,5%-ға жеткен. Саладағы инвестицияның ең көп көлеміғ яғни барлық портфельдің 61%-ы немесе 2,03 трлн теңге дәстүрлі түрде тау-кен өндіру өнеркәсібі мен карьерлерді қазу сегментіне тиесілі. Сондай-ақ аталған сектордың үлесі бір жылда күрт азайған: 2020 жылғы сәйкес кезеңде өндіруші салаға тартылған инвестиция көлемі 74,5%-ды құраған. Саладағы мұндай өзгеріс өңдеу сегментіндегі инвестициялық белсенділіктің күрт артуымен де байланысты. Мұнда күрделі салымдар бір жылда 88,4%-ға және нақты көлемде 82,9%-ға немесе 836,7 млрд теңгеге дейін өскен. Бұл – Қазақстан өнеркәсіптік секторы инвестициялық портфелінің 25,1%-ы. Өткен жылы саладағы көрсеткіш 12,2% болған. Тау-кен өндіруде дәстүрлі түрде мұнай-газ өндіру саласы көш басында тұр (1,52 трлн теңге немесе өндіруші сегмент портфелінің 75%-ы). Алайда өткен жылғы көрсеткіш 83,5%-ды құрапты. Металл кенін өндіру үлесі өндіруші саланың күрделі инвестицияның жалпы көлемінен 12,2%-дан 16,8%-ға дейін өскен. Қайта өңдеу сегментінде инвестицияның ең көп көлемі, яғни 37,7%-ы химия өнеркәсібі саласына бағытталған. Бұл – 315,6 млрд теңге, өткен жылғы көрсеткіштен 5 есе артық. Инвестиция тартылған негізгі секторларға металлургия саласы (өңдеу саласындағы күрделі салымның 34,3%-ы немесе 287,3 млрд теңге), тамақ өнеркәсібі (8,4% немесе 70,4 млрд теңге) және құрылыс материалдары мен өзге де металл емес минералдық өнімдер өндірісі (6,1% немесе 51,2 млрд теңге) енді.