«Есте сақтауға көмектеседі»: Қостанайлық ұстаз әдеби шығармаларды комикске айналдырып жүр

Қостанай қаласындағы №17 мектептің қазақ тілі мен әдебиеті пәнінің мұғалімі Ақбота Ермағанбетова әдеби шығармаларды комикске айналдырып, оқушыларға ұсынуда, деп хабарлады Elordainfo.kz Оқу-ағарту министрлігіне сілтеме жасап. 

Жас мұғалім 5-9 сыныптарға сабақ береді. Ол оқушыларды кітап оқуға қызықтырудың ерекше әдісін ойлап тапқан. Жасанды интеллект арқылы қазақ әдебиетінің шығармаларын комикске бейнелейді. Осылайша, оқушылар көркем шығарма кейіпкерлерін сурет арқылы оңай тани алады. Яғни, автор шығарма тілін бала жеңіл түсінетіндей етіп өңдеп, шағын мәтінмен толықтырады.

Жас педагогтің комикске бейнеленген туындыларының қатарында М. Дулатовтың «Бақытсыз Жамал», Б. Майлиннің «Шұғаның белгісі», Т. Нұрмағанбетовтың «Анасын сағынған бала» және Қорқыт Ата, Т. Әбдік пен А. Алтай шығармалары бар. Мұғалім барлық авторлық құқықтарды Egov.kz порталы арқылы тіркеген.

«Мәтіндерді оқушылардың жас ерекшеліктеріне қарай бейімдеп, сөйлемдерді қысқартып, материалды оңай әрі түсінікті қабылдауға мүмкіндік жасаймыз. Комикстер — бұл тек қызықты формат қана емес, олар оқушылардың назарын аударып, сюжеттерді жақсы есте сақтауға көмектеседі», — дейді Ақбота Ермағанбетова.

Жас педагогтің оқушылары сабаққа белсене қатысады және облыстық, республикалық байқаулардан жүлделі оралуда. Ақбота Ермағанбетованың жобасы педагогтар арасында да танымал, осыған дейін бірнеше рет руспубликалық педагогикалық байқаулардың лауреаты атанды.

Қазіргі таңда ізденімпаз ұстаз Қазақстанда, Ресейде және Жапонияда жарияланған 30-дан астам ғылыми мақалалар мен 5 әдістемелік құралдың авторы. Бірақ, ең бастысы — оның идеялары оқушылардың жүрегінде із қалдырып, қазақ әдебиетін әр баланың жүрегіне жақындатуда.