ЖИ полиция қызметіне енеді: ІІМ қызметкерлері жаңа технологияны меңгермек

Ішкі істер министрлігі мен Жасанды интеллект және цифрлық даму министрлігінің Цифрлық үкіметті қолдау орталығы ішкі істер органдары қызметкерлерінің AI-құзыреттілігін дамыту және жасанды интеллект технологияларын қолдану саласындағы ынтымақтастық туралы меморандумға қол қойды, деп хабарлайды Elordainfo.kz Жасанды интеллект және цифрлық даму министрлігіне сілтеме жасап.

Құжатқа ішкі істер вице-министрі А.Сайтбеков пен ЦҮҚО бас директоры А.Оспанова қол қойды.

Премьер-Министрдің орынбасары - Жасанды интеллект және цифрлық даму министрі Жаслан Мәдиевтің тапсырмасы бойынша мемлекеттік органдар қызметкерлерінің күнделікті жұмысында вайбкодинг құралдарын қолдану бойынша жүйелі оқыту жүргізілуде. Ішкі істер органдары қызметкерлерін оқыту - мемлекеттік қызметшілердің жасанды интеллект саласындағы құзыреттерін дамытуға бағытталған осы ауқымды жұмыстың бір бөлігі.

Меморандум аясында ЦҮҚО ішкі істер органдарының қызметкерлері үшін ЖИ-агенттерін құру, жұмыс процестерін автоматтандыру және ІІМ қызметінің ерекшелігін ескере отырып цифрлық шешімдер әзірлеу бойынша практикалық оқыту ұйымдастырады.

«Біз мемлекеттік органдардың күнделікті жұмысына вайбкодингті жүйелі түрде енгізіп келеміз. Алғашқы нәтижелер де бар, онйың ішінде тиісті оқытудан министрліктің және ведомстволық бағынысты ұйымдардың 165 басшылары, сондай-ақ Ішкі істер министрлігі орталық аппаратының 800-ден астам қызметкері өтті. Келесі кезеңде бағдарламаны өңірлік полиция департаменттеріндегі мың маманға дейін кеңейтуді жоспарлап отырмыз. Жақын арада жобаға Ұлттық экономика министрлігі, Су ресурстары және ирригация министрлігі, Қаржы министрлігі және Қаржылық мониторинг агенттігі қосылады. Жыл соңына дейін барлық министрліктерді қамтуды көздеп отырмыз. Басты мақсатымыз – мемлекеттік қызметшілердің дайын ЖИ құралдарын ғана пайдалануы емес, өздерінің нақты жұмыс міндеттеріне бейімделген цифрлық шешімдерді өз бетінше әзірлей алуына мүмкіндік жасау», – деп атап өтті Қазақстан Республикасы Премьер-Министрінің орынбасары – Жасанды интеллект және цифрлық даму министрі Жаслан Мәдиев.

Оқыту ІІМ қызметіне вайбкодинг құралдарын ауқымды енгізудің негізіне айналады: заманауи технологияларды меңгеруден бастап ведомствоның нақты процестеріне арналған шешімдер жасауға дейін. Оларды қолдану қолмен орындалатын жұмыс көлемін қысқартуға, ақпаратты өңдеуді жеделдетуге және қоғамдық қауіпсіздікті қамтамасыз ету жөніндегі міндеттерді орындауға көбірек уақыт бөлуге мүмкіндік береді.

«Идеология «Заң мен тәртіп» ішкі істер органдарынан тек жүйелілік пен жауапкершілікті ғана емес, сонымен қатар азаматтарды қорғау үшін заманауи технологияларды қолдануға дайын болуды талап етеді. AI-құзыреттіліктің жаппай дамуы қызметкерлерге ақпаратпен жылдамырақ жұмыс істеуге, күнделікті процестерді қысқартуға және қоғамдық қауіпсіздікті қамтамасыз етуге көбірек уақыт бөлуге мүмкіндік береді. Сонымен қатар жасанды интеллект технологиялары заңды, ақпараттық қауіпсіздік талаптарын сақтай отырып және адам бақылауымен қолданылуы тиіс», - деп атап өтті ішкі істер вице-министрі Айдар Сайтбеков.

ЦҮҚО курсының ерекшелігі - ведомствоның нақты процестерімен практикалық жұмыс. Қатысушылар жасанды интеллект мүмкіндіктерін жай ғана үйреніп қана қоймайды, сонымен қатар болашақта ішкі істер органдарының күнделікті қызметінде қолданыла алатын ЖИ-агенттер мен цифрлық құралдар жасайды.

«Курс қызметкерлердің нақты кейстеріне негізделген. Қатысушылар автоматтандыруға болатын процестерді анықтауды және оларға жұмыс істейтін цифрлық шешімдер жасауды үйренеді. Курстың ерекшелігі ақпараттық қауіпсіздік талаптарын сақтай отырып, ЖИ-ды ішкі және сыртқы контурларда пайдалануға бағытталған. Біздің мақсатымыз - әзірленген әрбір құралдың нақты пайда әкелуі: күнделікті жұмысты қысқартып, қызметкерлерге негізгі міндеттерді тиімдірек орындауға көмектесуі», - деп атап өтті ЦҮҚО бас директоры Алия Оспанова.

Меморандумға қол қою Жасанды интеллект және цифрлық даму министрлігінің мемлекеттік қызметшілердің AI-құзыреттілігін дамыту және жасанды интеллект технологияларын мемлекеттік органдардың қызметіне жедел енгізу жөніндегі жүйелі жұмысының бөлігіне айналды.