Жеке тауарларды шетелден әкелу қағидалары: нені ескеру қажет

Еуразиялық экономикалық одақтың кедендік шекарасын кесіп өткен кезде жолаушылар жеке пайдалануға арналған тауарларды тасымалдаудың негізгі қағидаларын, бажсыз әкелу нормаларын және декларациялау тәртібін білуі маңызды. Бұл туралы қалалық Коммуникациялар қызметі алаңында Астана қаласы бойынша Мемлекеттік кірістер департаменті «Әуежай-Астана» кеден бекеті басшысының орынбасары Бауыржан Тұрлыбаев мәлімдеді, деп хабарлайды Elordainfo.kz.

Жеке пайдалануға арналған тауарларға не жатады?

Жеке пайдалануға арналған тауарлар деп кәсіпкерлік қызметпен байланысты емес жеке, отбасылық және тұрмыстық қажеттіліктерге арналған тауарлар түсініледі.

Бұл ретте кеден органдары тауардың мақсатын ғана емес, оның санын, сипатын және тасымалдау жиілігін де ескереді. Мысалы, жекелеген жаңа тауарлар бойынша сандық өлшемдер белгіленген. Мысалы, бір адамға 2 ұялы телефонға, 2 планшетке, 1 ноутбукке және 5 зергерлік бұйымға дейін жеке пайдалануға арналған тауарлар ретінде қарастырылады.

Жолаушы бірдей жаңа тауарлардың көп мөлшерде алып өтетін болса, кеден органы олардың нақты қандай мақсатта әкелініп отырғанын бағалауға құқылы.

Бажсыз әкелу нормалары

Жеке пайдалануға арналған тауарларды әуе көлігімен әкелу кезінде бажсыз норма құны бойынша 10 000 еуроға дейін және салмағы бойынша 50 кг-ға дейін белгіленген.

Белгіленген нормалардан асқан жағдайда, асып кеткен бөлікке кедендік төлемдер қолданылады. Әуе тасымалы үшін асып кеткен құнның 30% мөлшерінде, бірақ салмақ нормасынан асқан әрбір килограмм үшін кемінде 4 еуро мөлшерінде төлем қарастырылған.

Тауарлардың жекелеген санаттарына арнайы шектеулер мен талаптар қолданылуы мүмкін.

Қашан декларациялау қажет?

Жолаушылар кедендік декларациясы ЕАЭО заңнамасында көзделген жағдайларда, оның ішінде міндетті декларациялауға жататын тауарларды тасымалдау кезінде ұсынылады.

Қазақстанның халықаралық әуежайларында жолаушылар үшін «жасыл» және «қызыл» дәліз жүйесі қолданылады. «Жасыл дәліз» міндетті декларациялауға жататын тауарлары жоқ жолаушыларға арналған.

«Қызыл дәліз» арқылы тауарлары бар немесе оларды ерікті түрде декларациялауды қалайтын жолаушылар өтеді. Жолаушы «жасыл дәлізді» таңдаған кезде, ол өзінің міндетті түрде декларациялауға жататын тауарлары жоқ екенін мәлімдеген болып есептеледі.

Міндетті декларациялауға жататын тауарды декларацияламау заңнамаға сәйкес жауапкершілікке тартылуы мүмкін.

Сапар алдында нені тексеру керек?

Шекарадан өтпес бұрын жолаушыларға тасымалданатын тауарлардың құны мен салмағын алдын ала тексеру, сондай-ақ бірдей тауарлардың санына назар аудару ұсынылады. Сонымен қатар тауарға қатысты тыйымдар немесе шектеулердің бар-жоғын анықтау маңызды.

Қажет болған жағдайда тиісті рұқсат құжаттарын алдын ала дайындаған жөн. Сондай-ақ, тауардың міндетті декларациялауға жататынын анықтау қажет. Егер күмән туындаса, бақылаудан өтпес бұрын кеден органының қызметкеріне жүгінген дұрыс. Белгіленген талаптарды сақтау кідірістерден, қосымша шығындардан және ықтимал жауапкершіліктен сақтануға көмектеседі.

Ең бастысы – заңнама талаптарын сақтау

Кедендік қағидаларды сақтау жолаушыларға кідірістерден, қосымша шығындардан және ықтимал жауапкершіліктен аулақ болуға мүмкіндік береді.

Қазақстан Республикасында кедендік реттеу ЕАЭО Кеден кодексі, Қазақстан Республикасының «Қазақстан Республикасындағы кедендік реттеу туралы» Кодексі, Еуразиялық экономикалық комиссияның шешімдері және өзге де нормативтік құқықтық актілер негізінде жүзеге асырылады.

Кеден органдарының міндеті тек бақылауды жүзеге асыру ғана емес, сонымен қатар заңнаманың сақталуын қамтамасыз ету және мемлекеттің экономикалық мүдделерін қорғау болып табылады.