Іздеу 
Қазақстанда 51 жыл бұрынғы ауа райының рекорды жаңарды
Жәнібек Амангелді
Қаңтарда күн жылы болып, Қазақстанда ауа райының 51 жыл бойы сақталған рекорды жаңартылды, деп хабарлайды Elordainfo.kz Қазгидрометке сілтеме жасап.
Синоптиктердің мәліметінше, қаңтар айында елімізде ауа райының қарама-қайшылықтары кездескен.
«Бүкіл ел аумағында қаңтардың бірінші онкүндігінде, екінші онкүндіктің басы оңтүстікте жоғары температуралық фон аясында өтті. Орта Азия аймақтарынан жылы ауа массаларының көшуі кезінде бірқатар өңірлерде тарихи максимум жаңартылды», - делінген хабарламада.
11 қаңтарда Қарағандыда ауа температурасы +5,5 °C-қа жетіп, ол 2016 жылғы рекордтан 1,5 градусқа жоғары болды. Шымкентте +17,4 °C тіркеліп, 1987 жылғы максимумнан (+17,3 °C) асып түсті. Таразда термометр бағандары +19,3 °C-қа көтеріліп, 1999 жылғы рекордты (+14,2 °C) айтарлықтай басып озды.
12 қаңтарда Ақтауда ауа температурасы +13,4 °C-қа дейін жылынды, бұл 2025 жылғы рекордтық мәннен (+9,7 °C) жоғары. Қарағандыда +1,2 °C тіркеліп, 1975 жылғы максимумнан (+1,0 °C) асып түсті. Осылайша 51 жыл бұрынғы температуралық рекорд жаңартылды. Семейде ауа температурасы +1,5 °C болып, 1975 жылғы көрсеткіштен (+1,0°C) жоғары болды. Өскеменде ауа +4,4 °C-қа дейін жылып, 1987 жылғы рекордтан (+3,4 °C) асты.
13 қаңтарда Түркістанда +16,8 °C тіркеліп, 1986 жылғы максимумнан (+11,3°C) жоғары болды.
Астанада қаңтар айының орташа температурасы −14,3 °C болды, бұл климаттық нормадан (−14,5 °C) сәл жоғары. Айдың ең жоғары температурасы 11 қаңтарда тіркелді — +1,6 °C. Ең суық күн 17 қаңтар болды, бұл күні ауа температурасы −28,3 °C-қа дейін төмендеді.
