Іздеу Киберқылмыстың ашылуы 29%-ға өсті - Бас прокуратура
Жібек Наурыз
Бас прокуратурада интернет-алаяқтыққа қарсы іс-қимыл мәселелері бойынша ведомствоаралық кеңес өтті, деп хабарлайды Elordainfo.kz Бас прокуратураға сілтеме жасап.
Оған Ішкі істер министрлігінің Тергеу департаменті мен Киберқылмысқа қарсы іс-қимыл департаментінің басшылары қатысты.
Жұмыс қорытындылары шығарылып, жедел-тергеу қызметінің тиімділігін арттыру шаралары талқыланды.
Ағымдағы жылдың 2 айында интернет-алаяқтық саны 8,3%-ға төмендегені байқалады (4 385-тен 4 023-ке дейін).
Қылмыстық жауаптылыққа 913 құқықбұзушы тартылды.
Кибералаяқтықтарды ашу көрсеткіші 29%-ға өсті (36,5%-дан 66%-ға дейін), келтірілген залалды өтеу деңгейі 57%-ды құрады (3,4 млрд теңгенің 1,9 млрд теңгесі өтелді).
Дропперлік схемаларды анықтау бойынша белсенді жұмыс жалғасуда.
Дропперлік үшін жауапкершілік енгізілген сәттен бастап Қылмыстық кодекстің 232-1-бабы бойынша 400-ден астам іс тіркеліп, оның 66-сы сотқа жолданды.
Сонымен қатар, алаяқтар пайдаланатын SIM-карталар мен WhatsApp аккаунттарын белсендірушілердің қызметі тоқтатылуда.
Мәселен, ағымдағы жылдың ақпан айында Батыс Қазақстан облысында алаяқтарға көмектескен тұлға 6 жылға бас бостандығынан айырылды.
Ол өз атына мыңнан астам SIM-картаны рәсімдеп, оларды қылмыстық мақсатта пайдалану үшін алаяқтарға берген.
Сондай-ақ «сұр провайдерлерге» ерекше назар аударылуда, олар алаяқтарды виртуалды байланыспен қамтамасыз етеді.
Мысалы, осы жылдың қаңтар айында Қостанай облысында жалған байланыс операторының технигі шетелдік алаяқтық колл-орталықтарға IP-телефония қызметін көрсеткені үшін 7 жылға бас бостандығынан айырылды.
Жалпы, бүгінгі таңда жұмыстың негізгі қағидаты – тек орындаушылар мен ұйымдастырушыларға ғана емес, сонымен қатар киберорта мен қылмыс жасауға жағдай жасайтын факторларға да ықпал ету болып табылады.
Еске салайық, бұған дейін Шымкентте алаяқтар iPhone 17-ні 45 мыңға сатқаны туралы жаздық.
