Елордада үш ел театрлары бірлескен «Париждегі екі әйел» спектаклінің премьерасы өтті

Фото: Мәдениет және ақпарат министрлігі

Астанада Қазақстан, Оңтүстік Корея және Ресей театрларының бірлескен халықаралық жобасы «Париждегі екі әйел» спектаклінің премьерасы өтті, деп хабарлады Elordainfo.kz Мәдениет және ақпарат министрлігіне сілтеме жасап.

Қазақстан тарапынан қойылымға Қалибек Қуанышбаев атындағы Қазақ ұлттық музыкалық-драма театрының әртістері қатысты. Сонымен қатар спектакльде Ресейдің Станиславский атындағы Электротеатры мен Оңтүстік Кореяның PIAC театрының актерлері де өнер көрсетті.

Қойылым оқиғасы 1940-жылдары Париж қаласында өрбиді. Сюжет корей халқының тұңғыш кәсіби суретшісі, тәуелсіздік жолындағы қозғалыс белсендісі На Хэ Сок пен Антон Чеховтың «Шие бағы» пьесасындағы әдеби кейіпкер Раневская арасында диалог негізінде құрылған. Олардың символикалық кездесуі арқылы тарихи оқиғалар, тәуелсіздік үшін күрес және жауапкершілік тақырыптары қозғалады.

Айта кетсек, спектакльдің премьерасы 2025 жылы Сеул қаласында өтті. Астанадағы қойылым Корея Республикасының елшілігі жанындағы Корей мәдени орталығының қолдауымен ұйымдастырылды.

Бұған дейін қазақтың «Ою-өрнегі» ИСЕСКО-ның Ислам әлемі мұралары тізіміне енгенін жаздық.