Биыл Астанаға Сәтбаев атындағы каналдан қосымша су көзін тарту жұмысы басталады

Фото: Оңалхан Өнерхан

Бұл туралы «Астана су арнасы» кәсіпорнының мамандары мәлім етті, деп хабарлады Elordainfo.kz тілшісі.

Қазіргі таңда бас қаланың басты су көзі – «Астана» (Вячеславка) су қоймасы.

«Астана су арнасының» мәліметінше, елордадан оңтүстік-батысқа қарай 51 км жерде Ақмола облысының Аршалы ауданында орналасқан аталған су қоймасының көлемі – 410 млн текше метр.

«Астана Бас жоспары» ғылыми-зерттеу жобалау институтының жоспары бойынша 2026 жылы Қаныш Сәтбаев атындағы каналдан қосымша (баламалы) су көзі тартылып, №4 сорғы-сүзгі станциясын салу жобасы басталмақ», – деді Астана су арнасынан Elordainfo.kz тілшісіне.

«Астана су арнасы» кәсіпорны 3 станциясының біріншісі 1960 жылдан бері жұмыс істеп келеді, 2017-2018 жылдары реконструкция жасалған. 2011 жылы іске қосылған екінші станцияны түрік компаниясы салған. Ал үшінші жаңа станция 2024 жылы ақпан айында пайдалануға берілген.

Айта кетейік, Қ.Сәтбаев атындағы канал – Қарағанды және Павлодар облыстарының өнеркәсіп орындарын сумен қамтамасыз ететін маңызды нысан. Сондай-ақ канал Жезқазған, Қарағанды және Павлодар қалалары үшін ауыз судың негізгі көзі болып саналады.

Бұған дейін Астана қаласы тәулігіне қанша мөлшерде ауыз су қолданатынын жазған едік.