«Атамекен» ҰКП өкілі жаңа Конституция жобасын қолдады

Коллаж: Elordainfo.kz

«Атамекен» ұлттық кәсіпкерлер палатасының басқарушы директоры Динара Ақынбекова жаңа Конституция жобасында өңірлердің дамуын жеделдету және олардың инвестициялық тартымдылығын арттыруға арналған арнайы экономикалық және инвестициялық аймақтар құруға ерекше назар аударылғанын атап өтті, деп хабарлады Elordainfo.kz.

«Өңірлерді, оның ішінде жеделдетілген даму аймақтарын қаржыландыру мен дамытуға бағытталған арнайы аймақтар құру кезінде олардың маңыздылығы ескеріледі әрі бұл Конституция деңгейінде бекітіледі», - деп атап өтті Динара Ақынбекова.

Сонымен қатар жаңа Конституция жобасында адам құқықтары мен бостандығын қорғау маңызды орын алады. Құжатта әр азаматқа ешқандай кемсітусіз жұмысқа орналасуға және жұмыс істеуге мүмкіндік беретін еңбек құқығы бекітіледі.

Азаматтардың мүдделерін қорғауға бағытталған «Заң мен тәртіп» саясатының қағидаттарына сәйкес келетін заңның кері күші нормалары нақты анықталған.

Сарапшы жаңа Конституцияның жобасы Қазақстанның жаңғыртуға, әлеуметтік әділеттілікке және мемлекеттік басқарудың ашық әрі орнықты жүйесін қалыптастыруға деген ұмтылысын көрсететінін атап өтті.

Еске салайық, Премьер-министр Олжас Бектенов жаңа Конституция жобасы мемлекет пен бизнес арасындағы сенім мен ұзақмерзімді серіктестік орта қалыптастыратынын айтқан еді.