Елімізде ақбөкендер саны қалай реттеледі

Президент Ұлттық құрылтайдың IV отырысында Үкіметке ақбөкендер санының күрт арту жағдайын талдауды тапсырған еді. Осыған байланысты экология және табиғи ресурстар министрі Ерлан Нысанбаев Үкімет отырысынынан кейінгі өткен баспасөз конференциясында ақбөкендер саны қалай реттелетіні туралы айтты, деп хабарлады Elordainfo.kz.

«Біз бірінші кездесуді ғылым өкілдерімен, сондай-ақ ақбөкендер бойынша маманданған сарапшылармен ұйымдастырдық. Екінші кездесу алдағы уақытта өтеді. Ақбөкендер санын реттеуді зерттеп,  әрі қарай не істеу керектігін немесе басқа шараларды қабылдауды шешуі үшін уақыт қажет. Бүгінгі таңда адами фактор бар. Екіншіден, біз эпизоотия бөлігіндегі осалдықты көреміз. Мұнда өте салмақты шешім қажет»,- деді экология және табиғи ресурстар министрі. 

Ерлан Нысанбаевтың сөзінше, шешім биыл қабылданады.

Журналистер министрден ақбөкендердің санын реттеу қалай жүзеге асатынын нақтылады. 

«Әдеттегідей. Біріншісі арнайы қаламдар арқылы. Екіншісі-ату. Басқаша қалай? Бірақ әзірге ғылыми зерттеліп жатыр», - деді министр.