Балаларға арналған танымдық ойын-сауық жобасы іске қосылды

Елордада «Phenomenal kids» танымдық ойын-сауық жобасының таныстырылымы өтті, деп хабарлады Elorda.info.

Жоба мектеп пен мектепке дейінгі жастағы балаларға арналған. Мұнда олар ертегілер, бесік жырлар және таным-көкжиегін дамытатын түрлі контенттер жарияланады. 

Бұл жобаның идея авторы – продюсер Азат Абыкен. Оның айтуынша, мұны әзірлеуге танымал актерлер мен блогерлер атсалысқан. 

Бүгінгі презентацияға қалалық мәслихат депутаты Ерлан Дәкенов, Олимпиада чемпионы және боксшы Серік Сапиев, әнші Қарақат Әбілдина, тележүргізуші Ләйлә Сұлтанқызы және т.б. қатысты.

Жобада танымал актер Дәурен Серғазин, Сырым Қашқабаев, әнші Қарақат Әбілдина, тележүргізуші Ләйлә Сұлтан, Динара Сатжан және т.б. балаларға арналған ертегілерді оқиды. Мұндағы мақсат –  бесік жырлары мен ертегілер арқылы балаларды тәрбиелеу. Көрермендер «Phenomenal kids» жобасын YouTube бейне хостингінде тегін көре алады, - деді Азат Абыкен.

Идеяның авторы және жобаны жасаушы Азат Абыкен  алдағы уақытта толыққанды сериал немесе толықметражды фильм түсіруді жоспарлап отыр. 

Жобаны жасауға шамамен жарты жыл уақыт кетті. Бұл  – жобаның  бірінші маусымы. Ал оның екінші маусымының презентациясын  жыл соңында  өткіземіз, - деді Азат Абыкен.