АЭС салу инвестициялық тартымдылықты арттырады

ҚР Өнеркәсіп және құрылыс министрлігінде Президенттің атом электр станциясын салу жөнінде референдум өткізу туралы Жарлығы аясында АЭС құрылысын қолдауға арналған Астана қалалық Халықтық штабының мүшелерімен кездесу өтті, деп хабарлады Elordainfo.kz.

Баяндамашылар ретінде Ядролық физика институтының Астана филиалының инженері, «Байтақ», «Ауыл» партияларының жетекшілері және Астана қаласынан депутат болып сайланған «АМАНАТ» партиясының мүшелері болды.

Жиын барысында спикерлер АЭС құрылысының әлеуметтік-экономикалық тиімділігіне тоқталды. Мысалы, АЭС еліміздің меншікті отын базасының әлеуетін кешенді пайдалануды және 60 жылдан астам уақыт бойына сенімді энергиямен қамтамасыз етіп, Қазақстанның инвестициялық тартымдылығын арттыратынын айтты.

Сондай-ақ АЭС пен жел электр станциясы генерациясының салыстырмалы талдауы, сондай-ақ әлемдегі жұмыс істеп тұрған реакторлардың статистикасы берілді.

Одан бөлек, спикерлер Қазақстанда АЭС салу үшін екі жер – Абай облысындағы Курчатов қаласы мен Алматы облысындағы Үлкен ауылының ауданы қарастырылғанын атап өтті.

Кездесуге қатысушылар спикерлердің баяндамаларынан АЭС құрылысы, пайдасы мен қауіп-қатері туралы өздерін қызықтыратын сұрақтарын қойып, оларға жауаптар алды.