Астанадағы бұқаралық велошеруге 1000-ға жуық әуесқой спортшы қатысты

Конституция күніне орай елорда маңындағы «Жасыл белдеу» саябағында бұқаралық велошеру өтті, деп хабарлады Elordainfo.kz.

Таңғы 9:00-де Қосшы бағыты бойынша айналма веложолдан Үркер тұрғын үй алабының саябағына дейінгі 25 шақырым қашықтықты еңсеруге 1000-ға жуық қала тұрғыны жиналды.

«Бүгінгі велошеруіміз «Заң мен тәртіп» және «Таза Қазақстан» акциясына арналған. Араға 2 айдай уақыт салып өтсе де, қатысушылардың қарасы көп болды. Өзіміз 700 адамға жоспарлаған едік. Бірақ лимит одан да асып түсті. Мұның барлығы мегаполисіміздегі азаматтардың салауатты өмір салтына тұрақты ден қойғанын білдіреді. Өзіміз де қуаныштымыз! Алдағы уақытта тағы да велошеру ұйымдастыру жоспарымызда бар. Ал ертең баршаңызды Saryarqa run бұқаралық жүгірісіне шақырамын», - деді Астана қаласы әкімдігінің Спорттық-бұқаралық іс-шараларды өткізу дирекциясы басшысының орынбасары Ержігіт Усербай.

Велошеруде велосипеді бар кез келген адам қатысуға мүмкіндік алды. Басты талап - қауіпсіздік мақсатында арнайы қорғаныс шлемі болуы. Сондай-ақ әр қатысушы дәл осы іс-шараға арнайы жасалған естелік медальға ие болды.

Спорттық мереке тек мәреге жетумен ғана шектелген жоқ.  Қатысушылар қолдарындағы билеттері арқылы 10 велосипед және түрлі сыйлықтарды ұтып алу үшін лотереяға қатысты.

Іс-шара соңында қала тұрғындарына ыстық шай мен палау ұсынылды.