Мәжіліс депутаты: Конституция – болашағымыздың темірқазығы

Президент Қасым-Жомарт Тоқаев Қазақстан Республикасы Конституциясының 30 жылдығына арналған «Конституция және мемлекеттілік: құқық пен болашақ диалогы» атты ғылыми-практикалық конференцияда сөз сөйледі. Осыған қатысты Мәжіліс депутаты Ерболат Саурықов өзінің әлеуметтік желідегі парақшасында пікір білдірді, деп хабарлады Elordainfo.kz.

«Мемлекет басшысының аталған жиында айтқан әр сөзі – еліміздің мемлекеттік, құқықтық және қоғамдық дамуына серпін беріп, болашаққа жол сілтейтін айқын бағдар. Ата Заң – ел бірлігінің, әділеттің, тұрақтылықтың кепілі. Мемлекет басшысы атап өткендей, 1995 жылы бүкілхалықтық референдум арқылы қабылданған Конституция – еліміздің егемендікке бет бұрып, тәуелсіз даму жолына түскен тарихи сәті болды. Бұл құжат – халқымыздың таңдауы, демократиялық дамуымыздың негізі. Қазақ халқы ежелден әділдік пен ақиқатқа негізделген дала заңдарын ұстанған. Қасым ханның қасқа жолы, Есім ханның ескі жолы, Әз Тәукенің «Жеті жарғысы» – біздің заңдық дәстүріміздің түп-тамыры. Осы тарихи сабақтастық бүгінгі Ата Заңымызда өз көрінісін тапты», - деді халық қалаулысы.

Оның айтуынша, конституциялық реформалар – Жаңа Қазақстанның берік іргетасы.

«Президентіміздің бастамасымен жүзеге асырылған 2022 жылғы конституциялық реформа – еліміз үшін жаңа дәуірдің бастауы болды. Конституцияның үштен бірі жаңартылып, қоғамның басты сұранысына айналған Әділдік, Ашықтық, Есептілік, Жауапкершілік қағидаттары заңнамалық негізге айналды. Бүгінде елімізде «Күшті Президент – Ықпалды Парламент – Есеп беретін Үкімет» қағидаты нақты іске асуда. Бұл – билік тармақтарының арасындағы теңгерім мен тиімділікті қамтамасыз ететін жаңа жүйе. Барлық деңгейдегі мәслихат пен әкімдер сайлауы өтті. Халық өз таңдауын жасап, басқару ісіне тікелей араласу мүмкіндігіне ие болды. Ауыл әкімдерінен бап, аудан және қала басшыларына дейін сайлау арқылы анықталып жатыр. Бұл – «Халық үніне құлақ асатын мемлекет» қағидасының нақты көрінісі», - деді спикер.

Сондай-ақ Мәжіліс депутаты ел дамуындағы жетістіктер – Ата заңымыздың әлеуетінің дәлелі екенін айтты.

«Біз, «Ауыл» партиясы, Мемлекет басшысының бастамаларын толық қолдаймыз. Конституциялық реформалар мен саяси жаңғыру – ауылдық аймақтарды дамытуға да кең жол ашты. Ауыл әкімдерінің тікелей сайлануы – жергілікті халықтың мүддесін нақты қорғауға бағытталған әділетті шешім. «Ауыл – ел бесігі» десек, Конституция – сол елдің алтын арқауы. Әділетті Қазақстан құру жолында ауыл халқы да өз үлесін қосып келеді. Біз, Парламенттегі және өңірлердегі өкілдер ретінде, Мемлекет басшысының тапсырмаларын іске асыру жолында аянбай еңбек етеміз! Ел дамуындағы жетістіктер – Ата Заңымыздың әлеуетінің дәлелі. Мемлекет басшысы атап өткендей, елімізде индустрия, инфрақұрылым, ауыл шаруашылығы және әлеуметтік салада ірі жобалар жүзеге асып жатыр. Бұл – заң үстемдігіне, әділеттілікке, халықтың сеніміне негізделген тұрақты даму жолының нәтижесі. Қорытындылай келе, біз бәріміз – бір дәуірдің, бір Тәуелсіз мемлекеттің азаматтарымыз. Болашақ ұрпаққа әділетті, дамыған, өркениетті ел қалдыру – ортақ міндетіміз», - деді Ерболат Саурықов.