Табиғат Зейнұлқабден: Мәслихат - қоғам мен мемлекетті байланыстыратын басты буын

Елордада Сенат жанындағы жергілікті өкілді органдармен (мәслихаттармен) өзара іс-қимыл жөніндегі кеңестің екі күндік кеңейтілген отырысы аяқталды. Бұл туралы Астана қаласы мәслихаты төрағасы Табиғат Зейнұлқабден өзінің Instagram-дағы парақшасында жазды, деп хабарлады Elordainfo.kz.

Мәслихат төрағасы кеңейтілген отырыс тәжірибе алмасу алаңы ғана емес, сонымен қатар жаңа идеяларды жүзеге асыруға мүмкіндік бергенін атап өтті. 

«Сенат төрағасы Мәулен Әшімбаев өз сөзінде соңғы 30 жылда мәслихаттардың мемлекеттік басқару жүйесінің маңызды бөлігіне айналғанын атап өтті. Бүгінде елде 3300-ден астам мәслихат депутаты бар, олар өңірлердің дамуына белсенді атсалысып келеді. Президент реформаларының нәтижесінде олардың рөлі айтарлықтай нығая түсті. Кеңесте әлеуметтік мәселелерге ерекше назар аударылды: зейнетақыны индекстеу, бюджеттік сала қызметкерлерінің жалақысын көтеру, мектептер мен медициналық нысандар салу. Жыл соңына дейін 200 мектеп пен 188 медициналық мекеме ашу жоспарланып отыр. Мәслихаттар өңірлердің дамуы мен қоғам мен мемлекетті байланыстырудағы басты буын болып қала береді»,- деп жазды Табиғат Зейнұлқабден.