Ұлттық және олимпиадалық ат спорты түрлерінің федерациясы жылды қорытындылады

Бүгін өткен қорытынды конференцияда үздік шабандоздар, жаттықтырушылар, спортшылар, жылқышылар және иппотерапия мамандары марапатталды. Бұл жөнінде Астана қаласы мәслихатының төрағасы Ерлан Каналимов өзінің Facebook-тегі парақшасында жазды, деп хабарлады Elordainfo.kz. 

«Бүгін Астана қаласы Ұлттық және олимпиадалық ат спорты түрлерінің федерациясы 2024 жылды қорытындылады. Өткен жылы федерация ауқымды 5 іс-шара ұйымдастырып, оған 6 мыңға жуық қатысушы мен көрермен тартылды. Олардың қатарында 3 ірі бәйге мен көкпар жарыстары өткізіліп, 10 мыңнан астам жанкүйерлер жиналды», - деп жазды Е.Каналимов. 

Астана қаласы мәслихатының төрағасы елордалық спортшылардың конкур бойынша да жоғары нәтижелерге қол жеткізгенін айтты.

«Олар республикалық жарыстарда 9 алтын, 7 күміс және 6 қола медаль жеңіп алып, халықаралық сайыстарда ұлттық құраманың ел қоржынына қосқан үлестерін арттырды. 

2025 жылы федерация 7 ұлттық спорт түрі бойынша жарыстар мен олимпиадалық бағдарламаға кіретін конкурдан 5 турнир өткізуді жоспарлап отыр», - деді ол.