Joltap түлегі Дженнифер Лопестің командасында қызмет етті

«Кез келген бизнес – тек табыс көзі емес. Ол сенің жан-дүниеңмен үндескенде ғана шын мәнінде өркендейді». Мұндай пікірді астаналық пішуші Әбдулманап Мұратов айтты. 31 жастағы елордалық жігіт Астанадағы концертте әлемге танымал әнші Дженнисер Лопеспен бірге жұмыс істеді. Әлемдік жұлдызбен жұмыс істеу оған одан сайын шабыт сыйлаған.

Қызылорда қаласының тумасы Әбдулманап Мұратовтың негізгі мамандығы – логистика. Алайда ол бала кезінен шығармашылыққа жақын болып өскен. Содан оқуын бітірген бойда елордаға қоныс аударып, жеке ателье ашқан. Оның айтуынша, шығармашылық ұжымның басты тірегі – пішуші. Оның басты маманы денсаулығына байланысты жұмыстан кеткен. Ал одан кейінгі қызметкерлердің жеткілікті тәжірибесі болмағандықтан, ательені жабуға тура келген.

Алайда ол елордадан Алматыға қоныс аударса да, кәсіптен қол үзбейді. Әбдулманап бизнестің түрлі саласында бағын сынап көреді. Бірақ іштей ол үнемі тігін саласына қайта оралуды ойлап жүрген.

«Басқа салалармен шұғылданып жүрсем де, ішкі жан дүнием ателье бизнесіне, тігіншілікке жақын екенін түсіндім. Ал ательені қайта ашу үшін әуелі өзім осы саланың қыр-сырын меңгеруім керек деп шешім қабылдадым», - деді ол.

Сол мақсатпен ол Астанаға қайта келіп, ақылы курстарды іздестірген. Арада көп уақыт өтпей, достары JolTap жобасы жайлы айтқан. Тіпті соның аясында пішуші жәге тігінші мамандықтарын тегін әрі қысқа уақытта оқуға болатынын жеткізген. Содан Әбдулманап бірден қаладағы «Баршаға мүмкіндік» модульдік пунктіне барып, курсқа жазылып, оқуды сәтті  тәмамдап шығады.

Курсты аяқтаған бойда қазақи киім тігетін ательеге жұмысқа орналасады. Мұнда заманауи стильде шапандар, көйлектер, тақиялар және т.б. тігіледі. Команда республикалық іс-шараларға қатысып, үлкен тәжірибе жинайды.

Бір айта кетерлігі, оның өміріндегі үлкен серпіліс – әлемдік мега жұлдыз Дженнифер Лопес Астанаға келер алдында болған. Оның айтуынша, өнер иесінің костюмдермен жұмыс істейтін тобына қосымша дизайнерлер мен тігіншілер керек болған. Содан кейіпкеріміз жұмыс істейтін командадан 15 адамның жұмысы ұсынылады. Нәтижесінде оның  ішінен тек 10 маман іріктеліп алынады. Солардың қатарында Әбдулманап Мұратов та болған.

«Концерт кезінде бір костюм тар болып қалды. Оны қайта тігуге үлгермейтін едік. Содан біздің дизайнер оны қайшымен кесіп, қайта қалыпқа келтірді. Джей Ло сахнаға сол костюммен шығып, әнін орындады. Кейін оның көмекшісі сахнада бәрі жақсы көрінгенін айтып, «Жұмыстарыңыз мінсіз» деп алғысын білдірді», - деп еске түсірді ол.

Концерт кезінде олар Дженнифер Лопестің және оның бишілерінің киімін 30 секунд ішінде толық ауыстырып отырған. Кәсіби мамандардан құралған команда бұл міндетті абыроймен атқарып шыққан.

«Бұл – аяқкиім, шалбар, көйлек – барлығын ауыстыру деген сөз. Дженнифер Лопес пен оның командасы – өте қарапайым жандар. Біздің еңбегімізді бағалап, жылы сөйлесті. Бұл мен үшін тек тәжірибе емес, үлкен мотивация болды», - деді спикер.