«Елорда жастары» бағдарламасына қатысып, үш бөлмелі үй алдым» – жоба қатысушысы

Астанада тұрып, еңбек ететін отбасылы жастар үшін елорданың төрінен үй алу – үлкен қуаныштардың бірі. Ал олардың тиімді шарттармен баспаналы болуына «Елорда жастары» тұрғын үй бағдарламасы зор көмегін тигізіп келеді. Осы бағдарлама арқылы бас қаладан үш бөлмелі пәтер алған жастардың бірі - Жанат Маканова, деп хабарлады Elordainfo.kz.

Ол 2009 жылы Сәкен Сейфуллин атындағы Қазақ агротехникалық университетіне оқуға түсіп, кәсіптік оқыту бағдарламасы мамандығын иеленгеннен бастап ел назары ауған елордаға тұрақтап қалды. Тұрмыс құрып, бүгінде үш баланың анасы атанған 34 жастағы кейіпкеріміз Astana Recycling Plant ЖШС-де есеп жүргізуші болып қызмет етсе, жолдасы TAS-PRODUCTION ЖШС-де технолог болып еңбек етіп келеді. Бұған дейін жалдамалы пәтерлерде тұрып келген Жанат Маканова «Елорда жастары» тұрғын үй бағдарламасы арқылы алған баспанасы – олардың Астанадағы алғашқы үйі екенін айтты.

«Елорда жастары» туралы Тұрғын үй қорынан естідім. Бағдарламаға «Отбасы банкі» арқылы қатыса алатынымызды білдік. Шарттары бойынша 10% бастапқы жарнамыз болуы керек екен. Конкурсқа қатыспас бұрын, осы банк менеджерлерімен кеңесіп, олардың айтқан тиімді ұсыныстарын орындадым. Сөйтіп, конкурстан өттік. Үй алғанға дейін жұмыс істейтін жастарға берілетін жалдамалы пәтерде бес жыл тұрдық. Шыны керек, бастапқыда қаражат жинауға мүмкіндігіміз аз болды. Несиеміз бар болатын, күнделікті өмірге қажетті шығындар да жетерлік. Тек соңғы жылы ғана қажетті қаражатты жинадық. Нәтижесінде 14 жылға 5%-бен, 145 мың теңге ай сайынғы төлеммен үш бөлмелі пәтерге қол жеткіздік», - дейді ол.

Жас отбасының жаңа қонысы елорданың «Сарыарқа» ауданында орналасқан. Үй маңында балабақша, мектеп, гүлзарлар орналасқан. Ал осындай жанға жайлы баспанаға қол жеткізу үшін кейіпкеріміз өзінен кейінгі жастарға, ең алдымен, ертерек депозитке қаражат жинай беру қажет екенін айтады.

«Жастарға аттарыңызда несие болса, тездетіп өтеп, депозиттеріңе ақша жинаған дұрыс деген кеңес берер едім. Өйткені аттарыңызға несие рәсімделмеген болуы керек және тұрақты жұмысыңыз болуы тиіс. «Елорда жастары» бағдарламасы арқылы құны 20 миллионға дейінгі үйді ала аласыздар, ал егер таңдаған баспанаңыздың бағасы одан асып кетсе, өздеріңіздің жинақ ақшаларыңыз көмекке келеді», - дейді Жанат Маканова.   

Айта кетейік, «Елорда жастары» бағдарламасы аясында Астанада тұрақты тіркеудің болуы, соңғы бес жылда жылжымайтын мүліктің болмауы және тұрақты табыс көзі болуы шарт.

Бағдарлама туралы толық ақпаратты zhilfond.kz сайтында және Тұрғын үй қорының әлеуметтік желілердегі ресми парақшалары арқылы білуге болады.