Астанада медициналық кадр мәселесі қалай шешіліп жатыр?

Астана қаласы Қоғамдық денсаулық сақтау басқармасының басшысы Әлия Рүстемова елордада ведомстволық бағынысты мекемелерде дәрігерлік кадрлардың тапшылығы айтарлықтай жоқ екенін мәлімдеді, деп хабарлады Elorda.info. 

Қазір ведомстволық бағынысты медициналық ұйымдарда 12 мыңға жуық медицина қызметкері жұмыс істейді, оның ішінде 3,5 мың дәрігер бар.

Қазіргі уақытта 83 дәрігер маманы тапшы. Бұл – негізінен учаскелік дәрігерлер. Кадрлардың ауысуы әртүрлі себептерге байланысты. Мысалы, жас маман-әйелдер отбасын құрып, декреттік демалысқа кетеді. Тағы бірі басқа мамандықтарға қайта даярланып, бағытын өзгертеді, кейбір дәрігерлер әртүрлі жағдайларда басқа қалаларға, елдерге көшеді, осылайша дәрігер кадрларының жетіспеушілігі қалыптасады. Әрине, басты себептердің бірі – физикалық және психоэмоционалды жоғары жұмыс, - деді басқарма басшысы.

Спикер медицина қызметкерлері үшін халықпен жұмыс істеу қиындай түскенін атап өтті.

Кейбір азаматтардың жиі агрессивті мінез-құлқы, медицина қызметкерлеріне қатысты қоқан-лоққылар мен қорлау біздің мамандарды жұмыс орындарын өзгертуге мәжбүр етеді. Қарапайым ғана құрмет көрсетілмейтін жерде кім жұмыс істегісі келеді?! Біз қызметкерлерімізге барлық жағынан қолдау көрсетеміз, оларға жұмыс істеу үшін тиісті жағдайлар жасауға тырысамыз және жасаймыз, мемлекеттің арқасында медицина қызметкерлерінің жалақысы қайта қаралып, артып келеді. Өткен жылы дәрігерлердің жалақысы 30%-ға, орта медициналық қызметкерлердің жалақысы 20%-ға өсті. Алайда, бұл мотивация да жеткіліксіз. Халық та денсаулық сақтау саласының мамандарына қамқорлық жасауы қажет. Бұл жерде ортақ жауапкершілік болуы тиіс, - деді Әлия Рүстемова.

Оның айтуынша, Қоғамдық денсаулық сақтау басқармасы мамандарды жыл сайын жақын және алыс шетелдердің жетекші клиникаларында оқытады. Оған жергілікті бюджеттен шамамен 200 млн теңге бөлінеді.

Дәрігерлердің қажеттілігін қамтамасыз ету үшін, оның ішінде жіті тапшы мамандықтар бойынша 2023 жылы жергілікті бюджет есебінен резидентураға 131 грант бөлінді. Сонымен қатар, өткен жылдары резидентураны аяқтап, ведомстволық бағынысты ұйымдарға 246 резидент жұмысқа орналастырылды. Мұның бәрі елордалық медициналық ұйымдарда дәрігерлік кадрлар бойынша тапшылықты іс жүзінде жабуға мүмкіндік берді, - деді ол.