Астанада Конституция күніне арналған мерекелік концерт өтті

Бейбітшілік және келісім сарайында Конституция күніне арналған «Әділет тірегі – Ата Заң» атты мерекелік концерт ұйымдастырылды, деп хабарлады Elordainfo.kz.

«Ата заңы мықты елдің заманы әрқашан тыныш болады. Сондықтан мен өз еліме тыныштық тілеймін. Әділеттілік пен құндылығын бағалай білетін,  тірегі бола алатын  елге айналуымыз - Ата заңымыздың арқасы. Баршаңызды осы мерекемен шын жүректен құттықтаймын. Әрқашан азамат ретінде өз құқығыңызды сақтай біліңіз және қорғай біліңіз», - деді Қазақстанның Халық әртісі Майра Мұхамедқызы.

Ата Заң – еліміздің басты құндылығы, мемлекетіміздің тұрақтылығы мен бірлігінің кепілі.

Мерекелік кеште Қазақстанның халық әртістері Айгүл Қосанова мен Майра Мұхамедқызы, сондай-ақ Сәкен Майғазиев, Өзгеріс Шерікбай, Салтанат Ерсұлтан өнер көрсетті. Концертке Мемлекеттік күзет қызметінің Президент оркестрі, «Түркістан» этно-ансамблі және «Contrasst» би театры да қатысты.

«Баршаңызды Конституцияның 30 жылдығымен құттықтаймын. Бұл мереке әрбір Қазақстан азаматы үшін үлкен мереке болуға тиісті. Өйткені әрбір азаматтың заң жүзінде құқығының қорғалуы бұл зайырлы мемлекеттің басты ұстанымы. Мереке құтты болсын. Еліміз аман, халқымыз тыныш болсын», - деді Қазақстанның Халық әртісі Айгүл Қосанова.

Көрермендерге патриоттық рухтағы әндер мен халықтық туындылар ұсынылып, ұлттық нақыштағы сахналық безендіру, LED-инсталляциялар және заманауи техникалық шешімдер мерекелік атмосфераны айқындай түсті.

«Әділет тірегі – Ата Заң» концерті – ел бірлігін дәріптеп, рухани құндылықтарды насихаттаған маңызды мәдени іс-шара болды.