2 мың гектар суармалы жерге су тартылады

Павлодар облысының екі ауданында суармалы жерлерге су тарту үшін инженерлік құрылғылар орнатылып жатыр, деп хабарлайды Елорда Инфо «Қазсушар» РМК баспасөз қызметіне сілтеме жасап. Мамандардың мәліметінше, Ақтоғай ауданының Әуелбек ауылында «Жангөбек» ЖШС тиесілі 1063 гектар аумақ сумен қамтылады. Сондай-ақ Май ауданы Майтүбек ауылында жалпы аумағы 1200 гектар жерге су жеткізу үшін инженерлік құрылғыларды жаңарту жұмыстары басталмақ. «Ауқымды шараға соңғы дайындық жұмыстары маусым айының соңында басталды. Қазір қажетті құбырлар әкелініп, құрылыс жүргізілуде. Ал Май ауданында егін егілетін жер қабаты алынып, құбырларды салу үшін қазба жұмыстары жүргізілуде. Айта кету керек, құбырлар – Степногорск құбыр зауыты шығаратын отандық өнім», – делінген «Қазсушар» РМК Баспасөз қызметі таратқан ақпаратта.