Ресейден 3 млн бума дәрі-дәрмек келді – вице-министр

Денсаулық сақтау вице-министрі Людмила Бюрабекова еліміздегі сауда желілерін дәрі-дәрмекпен қамтамасыз ету мәселесі қалай шешіліп жатқанын түсіндіріп берді, деп хабарлайды Елорда Инфо тілшісі. «Нарықты дәрі-дәрмектермен үздіксіз қамтамасыз ету әрі олардың қолжетімділігі Мемлекет басшысының тікелей назарында. Қазіргі уақытта Үкімет ел тұрғындарын амбулаторлық және стационарлық деңгейде дәрі-дәрмектермен қамтамасыз ету үшін шұғыл шаралар қабылдап жатыр. Үкімет қазіргі таңда амбулаториялық желілерге неғұрлым сұранысқа ие дәрі-дәрмектерді жеткізу үшін ұшақтардың бірнеше бортын ұйымдастырды», - деді вице-министр. Ол өз сөзінде өңірлерге сұранысқа ие 21 түрлі дәрі жіберіліп жатқанын тілге тиек етіп өтті. «ҚР Премьер-Министрінің орынбасары Ералы Тоғжанов отандық өндірушілермен көтерме дистрюбиторлармен мәжіліс өткізді. Шілде айының соңына дейін аптасына бірнеше рейспен қажет дәрілерді бөлшек сауда желісіне жеткізіп тұрамыз», - деді Л.Бюрабекова. Бұған қоса ол Ресейден жеткен гуманитарлық көмек жайлы қозғап өтті. «Өткен сенбі күні Ресейден екі борт дәрі-дәрмек келді. Онда дәрілердің 3 млн-нан астам бумасы жеткізілді. Олардың бәрі еліміздің үш ірі қаласы мен өңірлерге тең бөлінді. Олардың сертификаттауы мен қажет құжаттары жылдам рәсімделіп, сауда желісіне түсті», - дейді ведомство өкілі.