Тестілеу бойынша Қазақстан әлем елдері арасында 34-орында – Ләззат Ақтаева

ҚР Денсаулық сақтау министрінің міндетін атқарушы Ләззат Ақтаева онлайн брифингте тестілеу туралы түсініктеме берді, деп хабарлайды Елорда Инфо. «Қазақстан тәулігіне 100 мың тұрғынның 7 мыңына тестілеу жүргізеді. Ал Аустрия мен Канадада 100 мың тұрғынға тәулігіне 6 мың тест, АҚШ-та 8 мың тест жүргізеді. Бұл жөнінде Қазақстан әлем елдері бойынша 34-орында. Осы ретте тестілеу тек клиникалық және эпидемиологиялық көрсеткіш болғанда жүргізілуі керек. Клиникалық көрсеткіш – науқастың ауруханаға, яғни инфекциялық немесе провизорлық стационарға жатқызылып, ЖРВИ немесе пневмония диагнозы қойылуы. Сол сияқты коронавирустық инфекция жұқтырып, медициналық бақылауға алынған жағдай. Ал эпидемиологиялық көрсеткіш – науқастың жоспарлы немесе шұғыл ауруханаға түскен яки инфекция жұқтырғандармен байланыста болған тұлғалар. Сонымен қатар тестілеу шетелден елге оралған азаматтарға профилактикалық мақсатта да жүргізіледі», – деді ол.