«Трамадолды» рецептсіз сату қылмыстық жауапкершілікке әкеледі – ІІМ

Ішкі істер министрлігі «трамадолды» дәрігердің рецептінсіз сатқаны үшін қылмыстық жауапкершілік барын еске салды, деп хабарлады Elordainfo.kz.  

Ішкі істер министрлігі «Заң мен тәртіп» қағидатын қамтамасыз етуді жалғастырып жатыр. Дәріханалық нашақорлыққа қарсы күресті күшейту мақсатында 2023 жылы «трамадол» психотроптық заты есірткі заттарының тізіміне енгізілді.

«Есірткі қатарына енгізілгенге дейін «трамадол» ел бойынша сегіз мыңға жуық дәріханада сатылды. Қазіргі уақытта ол дәрігердің рецепті бойынша тиісті лицензиясы бар дәріханаларда ғана сатылады.

Медицинада қолданылатын есірткі және психотроптық заттарды рецептісіз сату деректеріне қатысы бар адамдарды анықтауға бағытталған жедел іздестіру іс-шаралары тұрақты негізде жүргізіледі. Жыл басынан бері «трамадолды» заңсыз сақтағаны үшін үш адам қамауға алынды. Олардан 2 500-ден астам таблетка тәркіленді», - делінген хабарламада.

Осыған байланысты дәріханалар мен фармацевтикалық компаниялардың басшыларына қолданыстағы заңнама талаптарын қатаң сақтау қажет екенін еске салады.

«Медицинада қолданылатын психотроптық заттар мен есірткілерді рецептсіз сату Қылмыстық кодекстің 297-бабы 3-бөлігімен қаралып, «есірткіні заңсыз өткізу» болып саналатынын ескертеміз. Бұл үшін 10 жылдан 15 жылға дейін бас бостандығынан айыру жазасы қарастырылған», - деді ІІМ есірткі қылмысына қарсы іс-қимыл комитеті басқармасы бастығының орынбасары Айбек Брыков.