Әркім өзінің АИТВ статусын білуі тиіс – дәрігер

Астана қаласы әкімдігінің «АИТВ-инфекциясының алдын алу орталығы» МКҚК алдын алу бөлімінің эпидемиолог-дәрігері Ж.Бекетова АИТВ-ға тексеріліп тұру қажеттігін айтты, деп хабарлады Elordainfo.kz.

АИТВ (адамның иммун тапшылығы вирусы) – адамдар үшін ең қауіпті вирустардың бірі. Бұл иммундық жүйеге әсер етеді, оның негізгі міндеті – денемізді инфекциялардан қорғау. Бірнеше жыл бойы вирус адамның мазасын алмай «тыныш» өмір сүреді. Егер адам өзін салыстырмалы түрде сау сезінсе, дәрігерлерге барып АИТВ-ға тексерілмейді. Ол өзін нашар сезінген жағдай да ғана өзінің АИТВ-статусын біледі.

Қоғамда АИТВ-инфекциясынан қауіпті өмір салтын ұстанатын адамдар: дәстүрлі емес жыныстық бағдары бар ер адамдар, инъекциялық есірткіні қолданушылар, тұрақсыз жыныстық өмір сүретіндер ғана зардап шегеді деген пікір әлі де болса кең таралған. Шын мәнінде, АИТВ-инфекциясы ресми некеде тұратын немесе бір серіктеспен ұзақ уақыт қарым-қатынаста болған адамдар арасында да тіркеледі.

Бүгінгі күні жыныстық белсенділікті бастағандардың барлығына АИТВ-ға тексерілу қажеттілігі туындады. Серіктестің АИТВ-статусын онымен жақын қарым-қатынасқа түспес бұрын анықтаған дұрыс. Егер бұл мүмкін болмаса, онда жыныстық қатынас басталғаннан кейін 1-3 айдан соң АИТВ-инфекциясына тексерілу қажет.

Жыныстық серіктесті ауыстырған кезде, егер сіз тосқауыл контрацептивтерін қолданбасаңыз, міндетті түрде АИТВ-ға тексерілуіңіз қажет. Себебі мүшеқапты қолдану ғана жыныстық жолмен берілетін аурулардан, соның ішінде АИТВ-инфекциясынан сенімді түрде қорғайды.

Адамдардың АИТВ-ға тексеруден өтпеуінің басты себебі - егер АИТВ анықталса, бұл туралы достар, әріптестер және таныстар біледі деген қорқыныш. Бұл тек қана қорқыныш. АИТВ-ға тестілеу құпия түрде өтеді, яғни денсаулық сақтау мамандары оң немесе теріс болса да, сіздің талдауыңыздың нәтижелерін жариялауға құқылы емес. Анонимді тестілеу жағдайында Сізге талдау нәтижелері берілетін нөмір беріледі. Бұл жағдайда сіз туралы қосымша мәліметтер берудің қажеті жоқ.

АИТВ-статусын білу үшін тұрғылықты жері бойынша медициналық мекемеде немесе АИТВ-инфекциясының алдын алу орталығында АИТВ-ға қаннан анализ тапсыру керек.

АИТВ-инфекциясына тексеру кеңес берумен бірге жүреді. Кеңес беру тексеруге дейін және одан кейін жүргізіледі. Тексеруге дейін медицина мамандары Сізге АИТВ-инфекциясының не екенін, инфекцияның қандай жолмен берілетінін, тексеру нәтижелерінің мәні туралы ақпарат береді. Тесттен кейінгі кеңес беру кезінде тексеру нәтижесі талқыланады.

Өткенді өзгерту мүмкін емес екенін естен шығармау қажет. Сондықтан егер инфекция шынымен қанға түссе, орын алған жағдайды қабылдап, терапияны үнемі қабылдау мәселелерінде өміріңізді және жоспарларыңызды өзгертуіңіз керек. АИТВ-инфекциясын ерте анықтау сәтті емдеу мүмкіндігін арттыра түседі. Бұл өз кезегінде денсаулық пен әл-ауқатты сақтауға көмектеседі.

Ең бастысы – денсаулығыңызды сақтау және өз өміріңізге жауапты болу! Болашақ бізге байланысты екенін ұмытпаңыз!

Егер сізге АИТВ бойынша кеңес қажет болса Астана қаласы, І.Есенберлин көшесі, 5/1, 38-07-02, 38-04-64 сенім телефондары арқылы хабарласыңыз не kazaids.kz сайтына жазыңыз.