Елордада «STOP-МЕЛАНОМА» ашық есік күні өтеді

24 мамыр күні Астана қаласындағы Ұлттық ғылыми онкологиялық орталықта терінің қатерлі ісігі мен меланомаға қарсы ақпараттандыруға арналған «STOP-МЕЛАНОМА» атты ашық есік күні өтеді, деп хабарлады Elordainfo.kz.

Ашық есік күні мына қызметтер ұсынылады: 

• тері мен теріасты тіндерінің ісіктері бойынша онколог-дәрігердің тегін қарауы;
• қажет болған жағдайда – тері жаңа түзілімдерін дерматоскопиялау;
• фотоқорғаныс пен тері рагының алдын алу бойынша ұсынымдар;
• теріні өз бетінше тексеру әдістері бойынша ақпарат.

Жағдайы ауыр  адамдарға ерекше көңіл бөлінеді: ашық түсті терісі барлар, денесінде көп меңі барлар, жиі күн астында болатындар және тұқым қуалайтын бейімділігі бар тұлғалар.

Қабылдауға келу үшін өзіңізбен бірге жеке куәлік пен бұрынғы дерматологиялық тексерістердің қорытындыларын (бар болса) алып келу қажет.

Меланома – меланоцит деп аталатын пигментті жасушалардан дамитын тері қатерлі ісігінің ең агрессивті түрлерінің бірі. Меланома тері ісіктерінің 5%-дан азын құраса да, тері рагынан болатын өлім-жітімнің ең көп бөлігі дәл осы ауруға тиесілі.

Қазақстан Республикасы Денсаулық сақтау министрлігінің деректеріне сәйкес, елімізде жыл сайын 300-ден астам жаңа меланома жағдайы тіркеледі. Аурудан өлім деңгейі әлі де жоғары, көбінесе кеш анықталуына байланысты. Ал ерте кезеңде анықталған меланома 90% жағдайда емделеді. Сондықтан дер кезінде анықтау – өмірлік маңызды.

Неден сақ болу керек?

Терідегі кез келген өзгерістерге – әсіресе меңдерге – назар аударыңыз.

Меланоманың ең алаңдатарлық белгілері «ABCDE» ережесімен сипатталады:

A (Asymmetry) – меңнің асимметриялы пішіні;

B (Border) – шекарасының тегіс емес, бұлыңғыр болуы;

C (Color) – түсінің әркелкі болуы (қара, қоңыр, қызыл, көк және т.б.);

D (Diameter) – диаметрі 6 мм-ден артық;

E (Evolving) – өзгерістер: өсуі, қышынуы, қан кетуі және т.б.

Қабылдау күні мен уақыты: 2025 жылғы 24 мамыр, сағат 9:00-13:00

Мекенжай: Астана қаласы, Керей мен Жәнібек хандар көшесі, 3/2, ҰҒОО-ның жаңа ғимараты.