Балалар әдебиетінің көбеюіне жағдай жасалады - Асхат Аймағамбетов

Бұл туралы Мәжілісі депутаты Асхат Аймағамбетов өзінің әлеуметтік желідегі парақшасында жазды, деп хабарлады Elordainfo.kz.

«Кітапханалар, кітап дүкендері, жазушыларды қолдау мен кітап шығару – бұл әрбір дамыған мемлекеттің стратегиялық бағыты.  Осыған байланысты біз Салық кодексіне бірнеше нақты түзетулерді ұсындық. Атап айтқанда,  жазушылар мен баспагерлерге салықтық жеңілдіктер, соның ішінде ҚҚС-ті едәуір төмендету, мемлекет тарапынан сапалы отандық әдебиетті шығаруға тікелей қолдау көрсету, қазақ тіліндегі заманауи әрі мазмұнды балалар әдебиетінің көбеюіне жағдай жасау. Әрине, мектептің рөлі үлкен. Бірақ бұл жауапкершілікті тек мектепке артып қою жеткіліксіз. Басты рөл – ата-ананың өзінде. Балаға кітапты сүюді үйрету үшін – алдымен ата-ана өзі кітапты сүюі керек»,- деп жазды мәжіліс депутаты.

Сонымен қатар ол кітап оқу мәдениеті ең алдымен отбасында қалыптасатынын атап өтті.  

«Бүгін – Халықаралық балалар әдебиеті күні. Балалық шақтан бастап кітап оқудың маңызы зор. Ол баланың ой-өрісін кеңейтіп, сыни ойлау қабілетін дамытады, құндылықтары мен тәрбиесіне, оқу үлгеріміне тікелей әсер етеді. Халықаралық зерттеулер, мысалы, PISA және TIMSS, оқу дағдылары мен білім жетістіктерінің тығыз байланыста екенін нақты көрсетеді. Мәселен, PISA зерттеуі бойынша, аптасына кемінде бір кітап оқитын оқушылар оқылым сауаттылығы бойынша бір оқу жылына тең артықшылыққа ие. Кітап оқу мәдениеті ең алдымен отбасында қалыптасады. Бала ата-анасын кітап оқып отырғанын көрсе, еріксіз сол әдетке қызығады. Бұл – жай теория емес, менің жеке өмірімде де талай мәрте дәлелін тапқан дүние»,- деп жазды ол. 

Асхат Аймағамбетов балаларымен бірге кітап оқу және оны талқылау жақсы дәстүрге айналғанын айтты. 

«Біздің үйде балалармен бірге кітап оқу және оны бірге талқылау – жақсы дәстүрге айналды. Мысалы, біз бірге «Менің атым – Қожа», «Көшпенділер», «Робинзон Крузо», «Том Сойердің бастан кешкен оқиғалары» және «Капитан Гранттың балалары» сияқты шығармаларды оқыдық. Балалар ежелгі Грекия, Мысыр, Скандинавия және Қазақ мифологиясына да ерекше қызығушылық танытып жүр. Меніңше, мұндай сәттер – бала мен ата-ана арасындағы терең сенім мен жақындықты қалыптастырады»,- деді ол.