Заң мен тәртіп: елордада прокурорлар студенттермен кездесу өткізді

Фото: видеодан скрин/prokuratura.ast

Астанада «Заң мен тәртіп» тұжырымдамасын іске асыру аясында «Сарыарқа» ауданының прокуратурасы Сәкен Сейфуллин атындағы Қазақ агротехникалық зерттеу университетінің студенттері мен оқытушыларымен профилактикалық кездесу өткізді, деп хабарлайды Elordainfo.kz.

Іс-шараға «Жайдарман» жобасының жетекшісі Есен Елеукен, университеттің табысты түлектері, профессорлық-оқытушылық құрам және студенттер қатысты.

Кездесу барысында жастар арасындағы құқық бұзушылықтардың алдын алу, интернет-алаяқтыққа, дропперлікке, есірткі қылмыстарына және өзге де құқыққа қарсы әрекеттерге қарсы іс-қимыл мәселелері талқыланды. Қатысушыларға жеке және ақпараттық қауіпсіздік шаралары, сондай-ақ құқық бұзушылықтар мен қылмыстар жасағаны үшін заңнамада көзделген жауаптылық түсіндірілді.

Жастар арасында құқықтық мәдениетті, азаматтық жауапкершілікті және заңға бағынатын мінез-құлықты қалыптастыру мәселелеріне ерекше назар аударылды.

Астана қаласының прокуратурасы жастардың құқықтық мәдениетін арттыруға, құқық бұзушылықтардың алдын алуға және «Заң мен тәртіп» қағидаттарын нығайтуға бағытталған профилактикалық іс-шараларды іске асыруды жалғастырады.