Іздеу Сенатор Бибігүл Жексенбай Астананың «Сарыарқа» ауданы полициясының жеке құрамымен кездесті
Кербез Әлішер
Парламент Сенатының депутаты Бибігүл Жексенбай Астана қаласының «Сарыарқа» ауданы Полиция басқармасына барып, бөлімшенің қызметімен танысты, деп хабарлады Elordainfo.kz Сенаттың баспасөз қызметіне сілтеме жасап.
Кездесу барысында қоғамдық қауіпсіздікті қамтамасыз ету, құқық бұзушылықтың алдын алу және құқық қорғау органдары жұмысының тиімділігін арттыру мәселелері талқыланды. Елорда халқының саны өсуі жағдайында тұрақтылық пен құқықтық тәртіпті қамтамасыз етудегі полицияның рөліне ерекше назар аударылды.
«Мемлекет басшысы Қасым-Жомарт Тоқаев полиция ашық, кәсіби және азаматтардың сеніміне ие болуы керектігін бірнеше рет атап өтті. Осыған байланысты құқық бұзушылықтың алдын алу, халықпен өзара іс-қимылды нығайту және құқық қорғау органдары қызметкерлерінің әлеуметтік қорғалуын арттыру ерекше маңызға ие болады», - деп атап өтті сенатор.
«Сарыарқа» ауданы елордадағы ең тығыз қоныстанған аудандардың бірі екені жеке аталып өтті. Мұнда теміржол және автовокзалдарды қоса алғанда, ірі көлік тораптары орналасқан, бұл қоғамдық қауіпсіздік мәселелеріне баса назар аударуды талап етеді.
Сонымен қатар, халықтың тығыздығына қарамастан, «Сарыарқа» ауданында қылмыс деңгейін төмендету бойынша оң динамика байқалады. Мәселен, өткен жылдың қорытындысы бойынша тіркелген құқық бұзушылықтар саны өткен жылдың сәйкес кезеңімен салыстырғанда 13,2 пайызға қысқарған, бұл қабылданып жатқан профилактикалық шаралардың тиімділігін және полиция қызметкерлерінің үйлесімді жұмысын көрсетеді.
«Соңғы жылдары полиция қызметкерлерінің әлеуметтік және құқықтық қорғалуын күшейтуге, цифрлық шешімдерді енгізуге және профилактикалық жұмыстың тиімділігін арттыруға бағытталған заңнамалық шаралар қабылданды. Бұл ретте басымдық жазалау шараларына емес, құқық бұзушылықтың алдын алуға беріледі», - деді сенатор.
Кездесуді қорытындылай келе, Бибігүл Жексенбай полицияның қоғамдағы тұрақтылық пен қауіпсіздікті қамтамасыз ететін маңызды институт екенін атап өтті. Ішкі істер органдары қызметкерлерінің кәсібилігі мен оларға деген сенімге қоғамдық тәртіп пен азаматтардың ертеңгі күнге деген сенімділігі тікелей байланысты.
Бұған дейін Бибігүл Жексенбай Астанада Еркеғали Рахмадиев атындағы Мемлекеттік академиялық филармонияға барғанын жаздық.
