Президент: Жастарға сенім артып, жауапкершілік жүктеу керек

Фото: Ақорда

Мемлекет басшысы бұқаралық ақпарат құралдары өкілдеріне арналған брифингте Jibek joly телеарнасының тілшісі Ділназ Ерланқызының Құрылтай депутаттығына үміткерлер арасындағы жастар туралы сұрағына жауап берді, деп хабарлайды Elordainfo.kz Ақорданың ресми сайтына сілтеме жасап.

«Сіз Мемлекет басшысы ретінде жастарға сенім артып, оларға ұдайы қолдау көрсетіп келесіз. Құрылтай депутаттығына үміткерлер арасында түрлі салада жемісті еңбек етіп жүрген жастар бар. Сіздің ойыңызша, олар Құрылтай жұмысына серпін бере ала ма?», - деп сұрады Ділназ Ерланқызы.

«Оны көре жатармыз. Біз жастарға сенім артамыз. Оларды кезінде түрлі лауазымдарға тағайындадық. Үкіметте жоғары қызмет атқарған жастардың бәрі өзіне жүктелген міндетті мүлтіксіз орындады деп айта алмаймын. Әрине, түрлі кедергі мен себеп кезігіп жатады. Дегенмен жастарға сенім артып, жауапкершілік жүктеу керек. Онсыз болмайды. Қазақстан – демография тұрғысынан жас мемлекет. Сондықтан жастарға зор сенім артамыз. Олар да бұған дайын болуға тиіс. Әйтпесе, кезінде министр болып, Үкіметке келген соң жұмыстың берекесін кетіргендер де болды. Бұған жол бермеуіміз керек», - деп жауап берді ҚР Президенті Қасым-Жомарт Тоқаев.