Іздеу 
Дәукен Тұрдашев
Астанадағы ҚР Ұлттық музейінде ел Тәуелсіздігінің 35 жылдығына арналған «Қызғалдақ мекені» көрмесі ашылды, деп хабарлайды Elordainfo.kz ҚР Мәдениет және ақпарат министрлігінің баспасөз қызметіне сілтеме жасап.
Экспозиция авторы – Қазақстан Республикасының еңбек сіңірген өнер қайраткері, Қазақстан Суретшілер одағының мүшесі Қазахбай Әжібекұлы.
Көрмеде туған жер тарихы, ұлттық рух, табиғи мұра мен тәуелсіздік идеясы тоғысқан. Экспозицияның негізгі тақырыбы – қазақ даласында өсетін қызғалдақ бейнесі арқылы халықтың қайсарлығын, азаттыққа ұмтылысын және ұлттық болмысының өміршеңдігін көрсету.
Көрмеге қойылған туындылар Қазақстанның тарихи-мәдени мұрасы мен ұрпақтар сабақтастығын таныстырады. Олардың қатарында Алтын Орда дәуірінен бергі тарихи тұлғалардың, сондай-ақ ұлы ойшыл Әбу Насыр әл-Фараби мен Абай Құнанбайұлының бейнелері бар.
Суретші шығармаларында білім мен әділет, ұлттық еркіндік және болашаққа ұмтылу идеялары көрініс тапқан. Бұл тақырыптар Тәуелсіз Қазақстанның рухани құндылықтарымен сабақтастырылады.
Экспозицияда кең-байтақ дала мен табиғат көріністеріне де ерекше орын берілген. Автор туындыларында жерді ел тарихының, ал қызғалдақты ұлттық рух пен еркіндіктің нышаны ретінде бейнелейді.
Көрменің негізгі идеясы – өнер арқылы өткен мен бүгіннің байланысын көрсету, тарихи мұраны дәріптеу және ұлттық құндылықтарды келер ұрпаққа жеткізу.
Бұған дейін Астанада Қазақстан мен Қытай мәдениетінің тоғыспалы жылы қорытындыланғаны хабарланған еді.
