Гандболдан Қазақстан әйелдер құрамасы Нью-Делиде (Үндістан) өтіп жатқан Азия чемпионатында алғашқы кездесуін өткізді, деп хабарлады Elordainfo.kz Olympic.kz сайтына сілтеме жасап.
Қазақстан құрамасы А тобында өнер көрсетуде. Бұл топқа Қытай, Сингапур және Оңтүстік Корея құрамалары кіреді. Отандастарымыз топтық кезеңді Қытай командасына қарсы ойынмен бастады. Кездесу қазақстандықтардың пайдасына 28:26 есебімен аяқталды.
Айта кетейік, келесі ойын 4 желтоқсанда өтеді. Қазақстандық спортшылар Оңтүстік Корея құрамасымен кездеседі.
