Іздеу Enbek.kz: Елімізде бос жұмыс орындары көбейді
Думан Аманжол
Қыркүйек айының басынан бері Enbek.kz электрондық еңбек биржасында жұмыс берушілердің белсенділігі жоғары деңгейде сақталып отыр, деп хабарлайды Elordainfo.kz Еңбек және халықты әлеуметтік қорғау министрлігіне сілтеме жасап.
Бүгінгі күні платформада 105 907 өзекті бос жұмыс орны бар.
Тамыз айында жұмыс берушілер жариялаған бос жұмыс орындарының саны шілдемен салыстырғанда 25,8%-ға артып, 131,6 мыңға жетті. Ал жұмыс іздеушілер 145,2 мың түйіндеме орналастырған. Бұл шілдедегі көрсеткіштен 2,8%-ға жоғары.
«Жалпы, 2026 жылдың басынан бері Enbek.kz платформасында 840,6 мың бос жұмыс орны және 1 022,4 мың түйіндеме орналастырылған», - делінген хабарламада.
Тамыз айында ең көп бос жұмыс орны білім беру саласында тіркелді – 61 мың. Бұл жаңа оқу жылы қарсаңында мамандарға деген сұраныстың артқанын көрсетеді.
Сонымен қатар бос жұмыс орындары қызмет көрсету, денсаулық сақтау және әлеуметтік қызмет көрсету, өңдеу өнеркәсібі, ауыл, орман және балық шаруашылығы, құрылыс салаларында да көп болды.
Өңірлер бойынша ең көп бос жұмыс орны Астана мен Алматыда жарияланған – әр қалада шамамен 10 мыңнан.
Тамыздағы бос жұмыс орындарының 46,6%-ы жоғары білікті мамандарға, 33,1%-ы орта білікті мамандарға, 20,3%-ы төмен білікті жұмысшыларға арналған.
Ал жұмыс іздеушілер орналастырған түйіндемелердің 46,5%-ы жоғары білікті, 35,5%-ы орта білікті, 18%-ы төмен білікті мамандарға тиесілі.
Жұмыс іздеушілердің арасында 35 жасқа дейінгі азаматтар басым. 35–44 жастағылардың үлесі – 25,8%, 45–54 жастағылар – 14,6%, ал 55 жастан асқандар – 6,7%.
Түйіндемелердің 60,6%-ын әйелдер, 39,4%-ын ерлер орналастырған.
Сондай-ақ өткен айда Enbek.kz платформасында 1 млн теңгеден жоғары жалақы ұсынылған бос жұмыс орындары да болды.
Олардың қатарында тау-кен өндірісіндегі ауысым бастығының жалақысы шамамен 2,06 млн теңге, киберқауіпсіздік маманы 2 млн теңгеге, ал кеніш директорының жалақысы 1,63 млн теңгеге жуық болды. Ал жалақы бойынша ең жоғары талаптар әкімшілік бөлім басшыларында шамамен 2,02 млн теңге, жаңа өнімдерді әзірлеу жобаларының жетекшілерінде 1,84 млн теңге, сату жөніндегі шеберлерде 1,75 млн теңге деңгейінде тіркелді.
Еске салсақ, Премьер-министр Олжас Бектенов елімізде еңбек еткісі келген адамға жұмыс табылатынын атап өткен еді.
