Тәуелсіздік күніне орай ТЖМ-нің 262 қызметкері марапатталды

Төтенше жағдайлар министрлігінде Тәуелсіздік күніне орай салтанатты жиналыс өтті, деп хабарлады Elorda.info.

Министрлік таратқан мәліметке сүйенсек, ТЖ вице-министр генерал-майор Ерлан Нұрпейісов қызметкерлерге салтанатты түрде лайықты наградалар табыс етті.

Қызметтік міндеттерін адал атқарғаны үшін және Тәуелсіздік күнін мерекелеуге байланысты ТЖМ ведомстволық наградаларымен 262 қызметкер марапатталды.Сонымен қатар, Тәуелсіздік күнін мерекелеу аясында ТЖМ волейбол, боулинг және шахмат комитеттері мен құрылымдық бөлімшелері арасында спорттық жарыстар өткізілді, - деп жазылған хабарламада.

Жарыс қорытындысы бойынша І жалпы командалық орынды Өртке қарсы қызмет комитетінің командасы, ІІ жалпы командалық орынды ТЖ алдын алу департаментінің командасы, ІІІ жалпы командалық орынды министрдің кеңесшілер тобының командасы иеленді. Жеңімпаздар дипломдармен және кубоктармен марапатталды.

Сонымен қатар «Менің тәуелсіз елім» тақырыбындағы суреттер конкурсына қатысқан қызметкерлердің 5-7 жас аралығындағы балалар марапатталды.