Тұрғын үй компаниясы үлескерлерге арналған жеке кабинетті іске қосты

Азаматтар енді өзінің үлестік қатысу шартының «Қазреестр» бірыңғай ақпараттық жүйесіне тіркелген-тіркелмегенін онлайн тексере алады, деп хабарлады Elorda.info.

«Тұрғын үй порталы» ақпараттық жүйесі үлескерлердің жеке кабинетін іске қосты. Жеке кабинет азаматтарға өздерінің үлестік қатысу шартын «Қазреестр» бірыңғай ақпараттық жүйесінде тіркеу фактісін тексеруге мүмкіндік береді, деп хабарлады компанияның баспасөз қызметі. 

Компанияның түсіндіруіне сәйкес, үлескерлердің жеке кабинеті онлайн режимінде ҮҚШ бойынша өзекті ақпаратты ұсынады, сондай-ақ мұнда тұрғын үй кешені, құрылыс салушы, уәкілетті компания туралы деректерді көруге болады. Сонымен қатар, үлескерлер үшін ыңғайлы болу мақсатында жеке кабинетте Қазақстан тұрғын үй компаниясының электрондық нұсқаларын, егер болған жағдайда қосымша келісімдерді, сондай-ақ Қазақстан тұрғын үй компаниясының есептік жазбасы туралы үзінді көшірмені сақтау мүмкіндігі жасалған.

Ескерте кетейік, әрбір әлеуетті үлескер «Тұрғын үй құрылысына үлестік қатысу туралы» Қазақстан Республикасының Заңына сәйкес, құрылыс салушылар әкімдіктің рұқсатын немесе ҚТК кепілдігін алғаннан кейін ғана құрылыс кезеңінде олардың қаражатын тарта алатынын білуі керек. Бұл ретте сатып алушымен міндетті түрде бекітілген үлгілік нысанға сәйкес, кейіннен оны Қазреестрде тіркей отырып, үлестік қатысу шарты жасалуы тиіс. 

Үлестік қатысу шарты сәтті тіркелген кезде үлескермен мәміле еліміздің заңнамасы шеңберінде жасалғандығын растайтын тиісті үзінді көшірме қалыптастырылады.

«Бұл туралы құрылыс салушымен қандай да бір құжаттарға қол қоймас бұрын білу маңызды, өйткені кейбір компаниялар брондау, алдын ала сатып алу-сату, инвестициялау және тағы басқа шарттар жасасу сияқты заңсыз тәсілдермен үлескерлердің қаражатын тартады. Егер үлескерлермен осындай шарттар жасалған болса, онда тұрғын үй алуға кепілдік жоқ», – делінген хабарламада.