«ҮРКЕР» – 2024 ұлттық бәйгесіне өтінімдер қабылдау басталды

Фото: дереккөз

Мәдениет және ақпарат министрлігінің ұйымдастыруымен баспа, радио, интернет-журналистика саласындағы «ҮРКЕР» – 2024 ұлттық бәйгесіне өтінімдерді қабылдау басталды, деп хабарлады Elorda.info.

Медиаконтент өндіретін және тарататын республикалық, өңірлік және халықаралық радиостанциялар, баспа және интернет-басылымдар байқауға қатыса алады.

Өтінімдер 13 тамыздан бастап 1 қыркүйекке дейін қабылданады.

Конкурстық жұмыстар 2023 жылдың 7 тамызы мен 2024 жылдың 11 тамызы аралығында республикалық, өңірлік және халықаралық баспа және интернет-басылымдарда жариялануы немесе радиоэфирде шығуы тиіс. Әр үміткер байқаудың тек екі номинациясына қатыса алады.

Өтінімдер urker-awards.kz ресми сайтында 12 номинация бойынша қабылданады:

Жылдың үздік сұхбаты;
Жылдың үздік репортажы;
Әлеуметтік тақырыптағы үздік материал;
Жылдың үздік журналистік зерттеуі;
Жылдың үздік аналитикалық материалы;
Радиостанциядағы үздік жоба;
Жылдың үздік фотосуреті;
Жылдың үздік жаңалықтар порталы;
Үздік өңірлік БАҚ;
Халықаралық БАҚ-та Қазақстан туралы жарияланған үздік материал (баспа, радио, интернет-журналистика саласында);
Үздік подкаст;
Үздік YouTube каналы.

Жұмыстарды беделді журналистер, саланың еңбек сіңірген қайраткерлері мен халықаралық медиасарапшылардан құралған тәуелсіз қазылар алқасы бағалайтын болады.

Конкурс қорытындысы бойынша әр номинацияның жеңімпазына «ҮРКЕР» – 2024 естелік мүсіншесі мен 1 000 000 теңге көлемінде ақшалай сыйақы табысталады.