Ұландықтар есірткі тасымалдаушыны ұстады

Шымкентте ІІМ Ұлттық ұланы 6506 әскери бөлімінің қызметшілері қылмыстық атқару жүйесі департаментінің қызметкерлерімен бірлесіп №53 түзеу мекемесінің аумағына есірткі тасымалдаған ер адамды ұстады, деп хабарлады Elordainfo.kz Ұлттық ұланның баспасөз қызметіне сілтеме жасап.

«Оқиға 1 желтоқсан күні кешкілік болған. Түзету мекемесінің қызметкерлері мекеменің айналасында жүрген азаматтың күдік тудыратын мінез-құлқын байқайды. Дереу олар бейнебақылау камераларын қарап отырып, оның әрекеттерін тіркейді. Кейін  Ұлттық ұланның әскери қызметшілеріне ұстау үшін ақпарат береді», - деп жазылған хабарламада.

Әскери жасақ бастығы қатардағы жауынгер Арыстан Бисенов, патрульдік Азамат Бағланұлы, Ерлан Гумировтың үйлесімді іс-қимылдарының арқасында ер адам ұсталды. Ұстау кезінде ер адамның есірткі заттарын ҚАЖ мекемесінің маңында орналасқан жеке үйдің аумағы арқылы лақтырғаны анықталды.

Қазіргі уақытта ұсталған адам одан әрі тергеу үшін құзыретті органдарға жіберілді. Құқық қорғау органдары істің барлық мән-жайын анықтау бойынша жұмысты жалғастырып жатыр.

Құқық қорғау органдары азаматтарды қырағы болуға және күдікті әрекеттер туралы хабарлауға шақырады.