«Кінәсін мойындамады»: Перизат Қайратқа қатысты тергеу аяқталды

Қаржы мониторингі агенттігі төрағасының орынбасары Жеңіс Елемесов сенат кулуарында Перизат Қайратқа қатысты тергеу аяқталғанын айтты, деп хабарлады Elordainfo.kz.

Жеңіс Елемесов БАҚ өкілдерінің «Перизат Қайрат кінәсін мойындады ма?» деген сұрағына жоқ деп жауап берді.

«Өздеріңіз білесіздер, ол оңалту орталығын салуға , су тасқынынан зардап шеккендерге көмектесуге және Палестинаға көмекке ақша жинады. Сонымен қатар ұрланған ақшаны заңдастыруға тырысқаны үшін екі факт тіркелді».- деді Қаржы мониторингі агенттігінің өкілі.

Оның сөзінше, қазіргі таңда  іс материалдарымен танысу процесі жүріп жатыр.

«Іс материалдарымен танысу қашанға дейін жалғасатыны белгісіз. Ол қылмыстық процеске қатысушыларға байланысты. Онда заттай дәлелдемелерді есептемегенде 100-ден астам том бар»,- деді Қаржы мониторингі агенттігі төрағасының орынбасары.

Жеңіс Елемесов келтірілген шығынның жалпы сомасы 3,5 млрд теңге екенін айтты.

«Қылмыстық істі тергеу кезеңінде бізде әр түрлі шығын мөлшері болғанын білесіздер. Қазіргі уақытта біз 3,5 миллиард теңге шығын сомасына тоқталдық. Қылмыстық жолмен алынған ақшаны заңдастыруға қатысты Перизат Қайрат гүл дүкенін сатып алуға ақша салған. Осылайша, ол өзін бизнес кеңістігінде ақша тауып жүрген кәсіпкер әйел ретінде көрсетті»,- деді ол.