Мемлекеттік органдар арасында жаңа чат іске қосылды

Мемлекеттік органдар арасында «Депутаттық сауал» атты жалпы чат іске қосылды. Бұл туралы ҚР Премьер-Министрінің Сенат депутаттарының сауалына берген жауабында айтылған, деп хабарлады Elorda.info inform.kz-ке сілтеме жасап.

Қазақстан Республикасының Парламентімен тиімді қарым-қатынас жасау Үкіметтің заң шығару қызметінің маңызды бөлігі болып табылады. Депутаттық сауалдарда көтерілетін мәселелердің өзектілігін ескере отырып, оларды сапалы қарастыру мәселелері Үкіметтің тұрақты бақылауында. Премьер-министр қол қойғанға дейін тиісті вице-премьерлердің жауаптарды тікелей мақұлдау тәжірибесі енгізілді. Сондай-ақ депутаттық сауалдарға жедел жауап беру мақсатында мемлекеттік органдар арасында «Депутаттық сауал» атты жалпы чат іске қосылды, - деді Әлихан Смайылов жауабында.

Оның атап өтуінше, Үкіметтің құрамына кіретін мемлекеттік органдардың бірінші басшыларына мұқият пысықталған, толық жауап дайындау мәселесін бақылауда ұстау тапсырылды.

Сондай-ақ мемлекеттік органдарға сауалдардың бастамашыларымен қарым-қатынас орнату және көтерілген мәселелерді шешудің нақты жолдарын ұсыну, қажет болған жағдайда бірлесіп талқылау жөнінде тапсырма берілді, - деді Үкімет басшысы.