Елордада «Түнгі қаладағы балалар» жедел алдын алу іс-шарасы өткізілді

Астанада кәмелетке толмағандар арасындағы құқық бұзушылықтар мен қылмыстардың алдын алу, балалардың қадағалаусыз және бақылаусыз қалуының алдын алу мақсатында «Түнгі қаладағы балалар» жедел алдын алу іс-шарасы өткізілді, деп хабарлады Elordainfo.kz.

«Түнгі қаладағы балалар» жедел алдын алу іс-шарасын өткізу кезінде Алматы және Нұра аудандарының мамандары кәмелетке толмағандарды, ІІО есебінде тұрған қолайсыз отбасыларды, сондай-ақ өмірлік қиын жағдайлардағы отбасыларды тұрғылықты жері бойынша тексерді. Сондай-ақ кәмелетке толмағандардың түнгі уақытта тұрғын үйден тыс жерде, ойын-сауық орындарында заңды өкілдерінің еріп жүруінсіз болуына жол беру фактілерін анықтау мақсатында рейдтік іс-шаралар жүзеге асырылды.

«Құрметті ата-аналар! Қазақта «Баланың бас ұстазы – ата-анасы» деген сөз бар. Жас кезінде дұрыс тәрбие алмаса, есейе келе тәртібі қиындап, оқу үлгерімі нашарлап кетеді. Мұндай жағдайларда «не істеу керек?» деген ой туады. Әрине, ата-аналар балаларының оқу үлгеріміне күнделікті назар аударып, оны қадағалап отыруы қажет. Тәрбие ешқандай үзіліс, демалыс күндер дегенді білмейді.

Сөз соңында айтарым, «Ұлды тәрбиелеп отырып, жер иесін тәрбиелейміз, қызды тәрбиелей отырып, ұлтты тәрбиелейміз», - дейді Астана қаласы Нұра ауданы полиция басқармасының ювеналды полиция инспекторы, полиция майоры Ұлбосын Мұсабекова.

Айта кетейік, рейд қорытындысы бойынша 13 адам әкімшілік жауапкершілікке тартылды.