«Астана» мен «Челси» матчының билеттерін қашан сатып алуға болады

Фото: Instagram/fca.astana

Бүгіннен бастап «Астана» мен «Челси» арасындағы ойынның билеттері сатылымға шыға бастайды. Бұл туралы «Астана» футбол клубы әлеуметтік желідегі парақшасына жазды, деп хабарлады Elordainfo.kz.

«Астана» футбол клубының мәліметінше, матчқа деген қызығушылық танытқандар көп болуына байланысты билет сату бойынша келесі қауіпсіздік шарттары қарастырылған:

- Бір қолға 4 дана билет сатылады: сатып алу электрондық пошта, телефон нөмірі және несие картасын тіркеу арқылы жүзеге асырылады;

- Билеттер жеке тұлғаға рәсімделеді, тапсырыс беру кезінде әрбір келушінің деректерін енгізу қажет, матчқа барған кезде өзімен бірге растайтын құжат болуы тиіс;

- Матчқа қатысу құқығын беретін QR коды бар электрондық билет матч күні электрондық поштаға жіберіледі;

- www.zakazbiletov.kz сайтындағы кезектің артуына байланысты, онлайн кезек іске қосылуы мүмкін.

Еске сала кетейік, УЕФА Конференциялар лигасының жалпы кезеңінің матчы 12 желтоқсанда, сағат 20:30-да Алматыдағы Орталық стадионда өтеді.