Бауыр ауруын туғызатын 7 әдет

Әлемдегі ірі медициналық орталықтардың бірі саналатын АҚШ-тағы Мэйо клиникасының зерттеушілері ағзамыздың басты “сүзгісін” істен шығаратын жеті әдетті атады.

Тізімнің басында алкоголь тұр: спиртті ішімдіктер зорығуға, көп күш салуға мәжбүрлейді, ал бұл кейде фиброзға, кейде циррозға алып келуі мүмкін. Бауырға залал келтіретін тағы бір проблема – әртүрлі аэрозольдерді дұрыс қолданбағаннан тыныс алу арқылы организмге түсетін химиялық заттар. 

“Аэрозольді бүріккіштерден абай болыңыздар. Мұндай өнімдерді жақсы желдетілетін бөлмелерде ғана қолданыңыздар. Инсектицид, фунгицид, бояулар және басқа да улы химикаттарды шашқанда бетперде тағып алыңыздар”, – деп ескертеді мамандар.

Дәрігерлердің айтуынша, сүзгі-органның жұмысын жеңілдетуге физикалық жаттығулар көмектеседі. Бауыр саулығы үшін күніне жарты сағат жаттығу жасап отырған дұрыс. 

Сондай-ақ сарапшылар жеміс пен көкөністің пестицидтері ағзаға түспес үшін оларды жақсылап жууды, жылына бір рет С гепатитіне скринингтен өтуді, тату мен пирсинг жасайтын құралдардың тазалығына мән беруді, сонымен қатар, дұрыс тамақтануды ұмытпау керектігін айтады. Бауыр үшін ең пайдасыз тағамдар тізіміне майлы, қуырылған, тұздалған тамақ жатады.