Астанада мемлекеттік авиацияның ұшу қауіпсіздігі мәселелері талқыланды

Қарулы күштердің Ұлттық әскери-патриоттық орталығында Қорғаныс министрінің бірінші орынбасары – Қарулы күштер Бас штабының бастығы, генерал-лейтенант Марат Құсайыновтың басшылығымен мемлекеттік авиацияның ұшу қауіпсіздігіне арналған ведомствоаралық конференция өтті, деп хабарлады Elorda.info.

Бұл шараны Қорғаныс министрлігінің Мемлекеттік авиация ұшуларының қауіпсіздігін қадағалау департаменті ұйымдастырды. Оған Қарулы күштер Әуе қорғанысы күштерінің, әскери жоғары оқу орындарының, әскери бөлімдердің басшылығы, Қорғаныс министрлігі құрылымдық бөлімшелерінің, ҰҚК авиациялық қызметінің, Ұлттық ұлан бас қолбасшылығы авиация басқармасының, авиация саласының мемлекеттік компаниялары мен кәсіпорындарының өкілдері қатысты.

Әскери ұшқыштың мәртебесі мен әлеуметтік қорғалуын арттыруға бағытталған маңызды мемлекеттік қолдау шаралары мен заңнамалық өзгерістерге тоқталған генерал-лейтенант Марат Құсайынов соңғы он жыл ішінде адам факторы бойынша апат деңгейі әлі де жоғары екенін атап өтті. Оның алдын алу үшін біліктілігі жоғары авиация персоналдары керек және іріктеу мен біліктілігін арттыру кезеңдерінде олардың кәсіби жарамдылығын айқындау қажет деді.

Конференция барысында мамандар ұшу қауіпсіздігін басқару саласындағы қызметті ұйымдастыру, сондай-ақ қажетті радиотехникалық құралдармен және арнайы әуеайлақ жабдықтарымен қамтамасыз ету мәселелерін де талқылады. Сондай-ақ, авиациялық оқиғаларды тексеру барысында анықталған кемшіліктер де, сындарлы ұсыныстар да айтылды.

Бұл шара жыл сайын тәжірибе алмасу және Қазақстанның барлық күштік құрылымдары мен басқа да мемлекеттік органдардың авиациялық қызметтерінің өзара іс-қимылын ұйымдастыру үшін өткізіледі.

Кездесу нәтижесінде 2023 жылға арналған мемлекеттік авиацияның ұшу қауіпсіздігін қамтамасыз ету саласындағы басты міндеттер айқындалып, тәжірибелік ұсынымдар әзірленді.