Алтай Көлгінов дене шынықтырумен айналысатын балалар санын арттыру қажет екенін айтты

Премьер-министрдің орынбасары Алтай Көлгінов дене шынықтырумен айналысатын балалар санын 2 есеге арттыру қажет екенін айтты, деп хабарлады Elorda.info.

Спортты дамытуға арналған жаңа тұжырымдаманы жеделдетуіміз қажет. Бұл жаңа тұжырымдамада бүкіл көрсеткіштер, алдымызда тұрған мақсат-міндеттер көрсетілуі тиіс. Әсіресе, жасөспірімдер, жастарды спортқа баулу, оның ішінде кәсіби спортшыларымызды дамыту мәселелері қамтылуы қажет. 2023, 2024 жылдары, жалпы алдағы 7 жылдық мерзімде қандай нәтижеге қол жеткізуіміз керектігі тұжырымдамада белгіленуі керек, - деді ол Мәдениет және спорт министрлігінің кеңейтілген алқа отырысында.

Вице-премьердің айтуынша, спорт мәселесі бойынша әзірленетін заң жобасында балалар спортын дамыту мәселесіне ерекше назар аударылуы тиіс.

Алдымызда дене шынықтырумен айналысатын балалар санын 2 есеге арттыру міндеті тұр. Бұл - біздің қолымыздан келетін міндет. Ол үшін бірлесіп жағдай жасауға тиіспіз. Мемлекеттік спорттық тапсырысты тиянақты іске асыру маңызды. Осында айтылған ұсыныстарды жан-жақты пысықтау қажет. Біреулер бәсекелестікке жол беру керектігін айтты. Ол да дұрыс. Кемшіліктер бар. Оларды да шешу қажет. Мұның бәрін жергілікті атқарушы органдармен пысықтаңыздар. Содан кейін тиісті шешім қабылдау керек, - деді Алтай Көлгінов.