Жеңілдетілген автонесие алуға кезекке тұрғандардың бәрі көлік алады – министр

Индустрия және инфрақұрылымдық даму министрі Қайырбек Өскенбаев Үкімет кулуарында жеңілдетілген автонесие бағдарламасы туралы айтып берді, деп хабарлады Elorda.info.

Жеңілдетілген автонесие бағдарламасы тоқтаған жоқ. Алайда бұрын оған 100 млрд теңге бөлінген. Енді мұндай қаражат бөлінбейді. Бұрын бөлінген ақша неғұрлым көбірек қайтарылса, сол бойынша автонесие берілуге тиіс. Алайда банктер қаржыны сәл жинап алып, кредитті береміз бе деген шешімді қабылдады. Менің ойымша, олар өздері біледі, бұл оларға қатысты бизнес процесс. Бірақ күнделікті түскен ақшаны күн сайын беріп отыру керек. Сондықтан жеңілдетілген автокредитті тоқтатпай, халықты да шулатпай, процесс күн сайын жүруі керек, - деді министр.

Сондай-ақ министрдің айтуынша, келесі жылы 120 мың көлік шығару жоспарланып отыр.

Бірінші кезекте 15 мың адам тұр, оның 13 мыңы көлік алды. Қосымша 16 мың көлік алуға өтініш берілді. 15 мың адам көлік алуға бұрын өтіш берген. Менің ойымша, бәрі әділ өтуі керек. Кім бірінші өтінішті берді, соларды қамту керек. Кейін келесі өтініш берген адамдармен жұмыс істеу керек. Әрине, кезекте тұрғандар көлігін ала алады. Біз жыл сайын ішкі өнімді арттырып жатырмыз. Биыл 110 мың көлік шығарамыз деп отырмыз. Олардың санын жыл сайын кемінде 30%-ға өсіреміз. Келесі жылы 120 мың көлік шығарамыз деп жоспарлап отырмыз және 130 мың көлікке дейін жеткіземіз, - деді Қайырбек Өскенбаев.