Қазақстанда халық саны 212 мың адамға өсті

Қазақстандағы халық саны 19,7 млн адамнан асты, деп хабарлады Elorda.info.

Ұлттық статистика бюросының мәліметінше, 19 715,2 мың адамның ішінде қалалықтар – 12 169,1 мың (61,7%), ауылдықтар – 7 546,1 мың адам (38,3%).

2022 жылдың басымен салыстырғанда халық саны 212,0 мың адамға немесе 1,1%-ға өсті. 2022 жылғы қаңтар-қазанда республика халқының табиғи өсімі 2021 жылғы қаңтар-қазанмен салыстырғанда (222,3 мың адам) 0,6%-ға кеміп, 221,0 мың адамды құрады. Табиғи өсімнің жалпы коэффициенті 1000 адамға шаққанда 13,51 адамды құрады, – делінген ақпаратта.

АХАТ органдары ұсынған азаматтық хал актілерінінің жазбаларындағы мәліметтерді өңдеу нәтижесінде, 2022 жылғы қаңтар-қазанда туғандар саны 333,1 мың адамды құрады, бұл 2021 жылғы тиісті кезеңге қарағанда 11,4%-ға аз (375,9 мың адам). 1000 адамға шаққандағы жалпы туу коэффициенті 20,37 туылғандарды құрады.

Қарастырылып отырған кезеңде қайтыс болғандар саны 112,1 мың адам болған, бұл 2021 жылғы қаңтар-қазанға қарағанда 27,0%-ға аз (153,6 мың адам) көрсеткіш. Өлім-жітімнің жалпы коэффициенті 1000 адамға 6,86 қайтыс болғандарды құрады, – делінген зерттеуде.