US Open: Елена Рыбакина үшінші айналымға өтті

Қазақстанның бірінші, әлемнің 4-ракеткасы Елена Рыбакина АҚШ ашық чемпионатының үшінші айналымына өтті, деп хабарлады Elorda.info Қазақстан теннис федерациясының сайтына сілтеме жасап.

Ол екінші айналымда дүниежүзілік рейтингте 127-орында тұрған, өткен жылы осы жарыстың ширек финалына дейін жеткен аустралиялық Айла Томляновичпен кездесуі керек еді.

Аустралиялық спортшы матчқа келуден бас тартты. Нәтижесінде жерлесіміз үшінші айналымға қарсылассыз жолдама алды.

Елена Рыбакина төртінші айналымға шығу үшін әлемнің 30-ракеткасы, румыниялық Сорана Кырстямен кездеседі. Ол екінші кездесуінде рейтингте 89-сатыдағы ресейлік Анна Калинскаяны қапы қалдырды – 6:3, 6:4.

#Елена Рыбакина