Бокстан Азия чемпионатының жеребесі тартылды

Бүгін 29 қараша – 11 желтоқсан күндері аралығында Таиланд Корольдігінің Чиангмай қаласында өтетін Азия чемпионатының жеребе тарту рәсімі өтті, деп хабарлады Elordainfo.kz.

Ерлер бәсекесінде 117 спортшы 13 салмақта жүлдеге таласады.

Оқи отырыңыз: Бүгін бокстан Азия чемпионаты басталады

Жеребе қорытындысына сәйкес, Қазақстан мен Өзбекстан елдерінің 8 боксшысы финалда жолығуы мүмкін.

48 келі салмақта Азия чемпионы атағын қорғайтын Санжар Тәшкенбай жарысты 1/4 финалдан бастайды. Ол Тәжікстан өкілі Мехрон Шафиев пен Анваржан Ходжиев (Қырғызстан) жұбының жеңімпазымен кездеседі.

51 келіде әлем чемпионы Сәкен Бибосынов та алғашқы қарсыласын ширек финалда күтеді. Ол Асылбек Жалилов (Өзбекстан) – Давадорж Лхагапдорж (Моңғолия) жұбының жеңімпазымен шығады.

54 келідегі әлем чемпионы Махмұд Сабырхан 1/8 финалда Тайпей спортшысы Ян-Лин Леймен жұдырықтасады. Ал ширек финалға өтсе, Кумара Жайаназбен (Шри-Ланка) айқасады.

57 келіде өз мүмкіндігін алған Оразбек Асылқұлов 1/8 финалда Зулхейлейн Мохамадпен (Малайзия) шығады.

60 келідегі Бибарыс Жексен 1/8 финалда-ақ көрші Өзбекстан өкілі Дилшод Абдумуродовпен кездеседі.

63,5 келіде Париж Олимпиадасында жақсы әсер қалдырған Мұхаммедсабыр Базарбайұлы ширек финалда жарыс қожайыны Сомчай Вонгсуванмен жұдырықтаспақ.

67 келіде әлем чемпионатының күміс жүлдегері Дулат Бекбауов 1/8 финалда Тайпей спортшысы Джиа-Джун Чиуан Вангты жеңуге тырысады.

71 келіде қайта өз мүмкіндігін алған тәжірибелі Абылайхан Жүсіпов бірінші қарсыласын 1/4 финалда тосады. Ол Тайпей немесе Түрікменстан боксшысы болып қалуы мүмкін.

75 келіде Диас Молжігітов 1/4 финалда Дайго Сунагадан айласын асыра алса, ересектер сапындағы алғашқы жүлдесіне қол созбақ.

80 келіде Ерасыл Жақпеков ширек финалда Сағын Сатыбалдыұлымен (Қырғызстан) күш сынасады.

86 келіде бес боксшы ғана тіркелгендіктен, әлем чемпионы Бекзад Нұрдәулетов жартылай финалда Данило Жасанмен (Украина) кездеспек.

92 келіде де бес боксшы қатысқанымен, Сағындық Тоғамбай ширек финалда қандасымыз, 2021 жылғы әлем чемпионатының қола жүлдегері Мадияр Сайдрахимовпен шығуға мәжбүр.

Аса ауыр салмақққа ауысқан Айбек Оралбай жартылай финалда басты фаворит әрі жастар арасында әлем чемпионы Жахонгир Закировпен шеберлік байқасады.

30 қараша – 4 желтоқсан күндері аралығында іріктеу жекпе-жектері өтсе, 5-6 желтоқсан – ширек финал, 7-8 желтоқсан – жартылай финал, 10-11 желтоқсанда финалдық кездесулер ұйымдастырылады.